Раде Петрович: "Нефтчи"га қарши ўйинда трибуналар мухлислар билан тўлишига шубҳа йўқ. Бор эътиборни мана шу ўйинга қаратамиз"

Ўйин ҳақида

- Оғир ўйин ўтказдик. Учрашувни яхши бошлагандик. Биринчи бўлимнинг ўзида рақиб дарвозасига 2 та гол уришни уддасидан чиқдик. Шундан сўнг жамоа ўйинида бир оз пасайиш ва хотиржамлик кўзга ташланди. Бу ҳолатдан рақиблар унумли фойдаланишди ва ҳисобни тенглаштиришди. Ўйиннинг боришидан келиб чиқиб захирадан футболчиларни ўйинга ташладик. Ўзгаришлар самарасини берди ва яна 2 та гол уришнинг уддасидан чиқдик. Ғалаба билан жамоамиз аъзоларини ва мухлисларимизни табриклайман. "Динамо" жамоасига эса навбатдаги ўйинларда омад тилаймиз.

- Жамоанинг айни дамдаги имкониятларидан келиб чиқсак, чемпионлик вазифаси ҳам кун тартибида борми?

- Биз ҳозир навбатдаги рақиблар ҳақида ўйлаяпмиз. Жамоамиз бош мураббийи Иван Бошкович ҳам дисквалификациядан сўнг майдонга қайтади. Олдинда бизни кубок доирасида "Нефтчи"га қарши ўйин кутаяпти. Шу учрашувда стадион трибуналари мухлислар билан тўлишига шубҳа йўқ. Биз ҳозир бор эътиборни мана шу ўйинга қаратамиз. Чемпионлик ҳақида саволингизга келсак, ҳар бир учрашувда ғалаба учун майдонга чиқамиз, албатта барчаси иккинчи даврада қайд этадиган натижаларимизга боғлиқ.

- Жамоа легионерлари яхши ўйин кўрсатишмоқда. Биринчи давра якунидан сўнг трансферлар режаси қанақа?

- Легионерларимиз савияси анчайин яхши. Улар жамоамизга таклиф этилишидан олдин ўз клубларида етакчилардан бўлишган. Дориев тўпурарлар жадвалида яхши натижа кўрсатаяпти масалан. Давралар оралиғида маҳаллий футболчилардан кузатиб юрганларимиз бор, балки амалга ошса 3-4 нафар янги номлар таркибимизда пайдо бўлади.