Отаменди Умид Аҳмаджоновга таклиф билан чиқди

Айни пайтда Миллий олимпия қўмитаси президенти ва Ўзбекистон футбол Ассоциацияси 1-вице президенти ҳисобланган Умид Аҳмаджонов томонидан Испания, Франция, Италия, Бельгия, Япония, Жанубий Корея, Қатар, БАА давлатлари футбол федерациялари билан ҳамкорлик алоқалари йўлга қўйилди.

Бельгиялик мутахассилар билан учрашувлар ташкил қилиниб Ўзбекистонда футболни ривожлантириш истиқболлари муҳокама қилинди. Шахсан Халқаро Олимпия қўмитаси Президенти Томас Бах, Осиё Олимпия кенгаши Президенти Шайх Аҳмад ал-Фаҳад ал-Сабах Ўзбекистон МОҚ президентининг таклифига биноан Тошкентга ташриф буюрди.

Шунингдек, 2026 йилда бўлиб ўтадиган Жаҳон чемпионати мезбонлари Канада, АҚШ ва Мексика футбол федерациялари президентлари билан Дубайда учрашув ташкил қилинди. Ўзбекистон миллий терма жамоаси тарихида биринчи марта Уругвай, Марокаш, Сенегал каби ФИФА рейтингида юқори ўринларда турувчи терма жамоалар билан ўртоқлик учрашувларида майдонга тушди. Шахсан Умид Аҳмаджоновнинг ташаббуси билан Real Madrid Foundation Clinic дастури доирасида испаниялик мутахассислар 16 кун давомида ўзбекистонлик мураббий ва футболчиларга мастер класслар ўтказишди.

Қисқа муддатда амалга оширилган ижобий ишлар натижасида ўзбек футболига жаҳонда қизиқиш пайдо бўла бошлади. Бир қатор хорижлик мутахассилар ушбу уринишлар юқори баҳолаб эътироф этишди.

Жумладан, ушбу саъй-ҳаракатларнинг самараси ўлароқ, 2018 йилнинг 19 июнь куни Бутунжаҳон Футбол Саммити директори Ўзбекистон футбол Ассоциацияси 1-вице Президенти Умид Аҳмаджоновни жорий йилнинг 24-25 сентябрь кунлари Испания пойтахти Мадридда бўлиб ўтадиган навбатдаги Халқаро футбол Конгрессига таклиф этди.

Ушбу футбол Конгрессида ўтган йили 70 дан ортиқ давлатлардан ташриф буюрган 2000 дан зиёд футбол соҳаси вакиллари иштирок этишган. Бу йилги Конгрессдан иштирокчилар сонининг ошиши кутилмоқда. Иштирокчилар орасида Жаҳоннинг энг кучли клублари, футбол лигалари, Халқаро федерациялар ва ассоциациялар, дунёга машҳур ОАВ ҳамда компанияларнинг вакиллари иштирок этишади.

Мариан Отаменди ушбу расмий таклифида МОҚ президенти ва Ўзбекистон футбол Ассоциацияси 1-вице Президенти Умид Аҳмаджоновнинг Ўзбекистонда спортнинг барча турлари хусусан, футболни ривожлантириш учун қилаётган меҳнатини юксак қадрлашини ҳамда Саммитга қилинадиган ташрифдан боши осмонга етишини таъкидлаган.