Мирфаз Муҳиддинов: “Ўйин аҳамияти? Кераксиздек туюлган ҳар қандай ўйинда ҳам интрига бор”

“Бухоро” ҳамда “Шўртан” жамоалари ўртасидаги ўринбосарлар учрашувидан (1-0) сўнг мезбонлар футболчиси, учрашувдаги ягона гол муаллифи Мирфайз Муҳиддинов ушбу ўйин ҳамда асосий таркиб баҳси ҳақида фикрларини билдирди.

- Очиғи ушбу ўйиндан завқ олдим. Тўп аксарият вақтда биз томонда бўлди. Шунга муносиб равишда имкон борича чиройли ўйинимизни кўрсатишга ҳаракат қилдик. Дарвозага ҳам кўплаб зарбалар берилди. Аммо шулардан фақат биттасигина тўрдан жой олди.

Голим ҳақида нима дейишим мумкин? Албатта ҳар қандай гол муаллифига ёқимли ҳиссиётлар бахш этади. Бу 12 ёки 13-голим. Умуман ўйин жиҳатидан бу мавсумдан кўнглим тўлди. Лекин ҳақиқий баҳони мураббийлар беришади. Агар шу руҳда ишлашда давом этсам кейинги мавсумда асосий жамоада ўйнашга умид қиламан. Бу ҳар қандай ёш футболчининг орзуси.

Эртанги ўйин ҳам ҳам қизиқарли ўтади деб ўйлайман. Тўғри баҳс натижаси ҳар икки жамоанинг ҳам турнир жадвалидаги ўрнига таъсир кўрсатмайди. Аммо қидирсангиз ҳар қандай ўйиндан интрига топиш мумкин. Масалан, совринли ўринлар учун курашган жамоамиз “Шўртан” билан дуранг ўйнашганди. Энди ўз мухлисларимиз қаршисида улардан устун эканлигимизни исботлашимиз керак. Қолаверса, “1000лик довонни" забт этишимизга учтагина гол етмай турибди. Мавсумни ажойиб статистика билан якунлашга нима етсин?! - дейди Мирфайз Муҳиддинов.


"Бухоро" матбуот хизмати