Месси Пеленинг рекордини янгилаган ўйиндаги бутсалар аукционга қўйилади. Тушган пуллар эса хайрияга сарфланади
15 апр 2021 21:05
Янгиликлар

Месси Пеленинг рекордини янгилаган ўйиндаги бутсалар аукционга қўйилади. Тушган пуллар эса хайрияга сарфланади

“Барселона” форварди Лионель Месси “Вальядолид”га қарши ўйинда рақиб дарвозасини ишғол этиб, каталонияликлар сафидаги 644-голини урганди.

Месси битта клуб сафидаги голлар сони бўйича Пеленинг “Сантос”да ўрнатган рекордини янгилашга эришган.

Леонинг ўша учрашувда фойдаланган бутсалар хайрия аукционига қўйилади. Бутсаларнинг модели Nemeziz бўлиб, уларга футболчининг дастхати қўйилган. Шунингдек, бутсага Мессининг рафиқаси Антонелланинг исми ва уч фарзандининг туғилган саналари тушурилган.

Дастлаб, аргентиналик “Адидас” билан ҳамкорликда ушбу бутсаларини Каталония миллий санъат музейига совға қилди. Музей раҳбарияти эса Месси ва экипировкани ишлаб чиқарувчи компания билан келишган ҳолда уларни Барселонадаги болалар шифохонасига ёрдам бериш мақсадида хайрия аукционига қўйишга қарор қилди.

“Барселона”даги 644-голимни уришга муваффақ бўлганимдан жуда хурсанд бўлдим, аммо энг муҳими, соғлиғи учун курашаётган болакайларга ёрдам бериш имконияти.
Умид қиламанки, апрелдаги аукцион инсонларнинг ушбу муаммога эътибор қаратишига ёрдам беради. Мазкур ташаббусни қўллаб-қувватлаётганларнинг барчасидан миннатдорман. Болаларга ёрдам бериш мен учун жуда муҳим”, дейди Месси.

Аукцион онлайн форматда ўтади ва 19-30 апрелга қадар давом этади.