Ла Лига. "Барселона" Хетафеда меҳмон, дебютант "Реал"га қарши ва 6-турнинг бошқа ўйинлари учун превью

5-тур учрашувлари ўтказилдан бўлсада, аммо барча жамоалар ҳам янги мавсумда 5 та ўйин ўтказишмади. 6-тур ўйинлари олдидан эса ҳамма ҳар хил ҳолатда. Олдинда эса бизни бир қатор ажойиб учрашувлар, муросасиз баҳслар кутиб турганига ишонамиз. Қуйида эса сиз учун 6-тур анонсларини ҳавола этамиз.
17.10 16:00 (Тошкент вақти) “Гранада” – “Севилья”

Мазкур турга икки жамоа 7 очко билан етиб келди. “Севилья” 3 та ўйинда шунча очко тўплаган бўлса, “Гранада” бу учун 4 та ўйин ўтказди. 2 ғалаба, 1 дуранг ва 1 мағлубият. Севиляьликлар эса ушбу мавсумда ҳали мағлубиятга учрамади. Мезбонларда тўплар нисбати ҳам ёмонроқ (6-8). “Севилья” эса бу борада ҳам яхши натижага эга (5-2).

Жамоаларнинг жароҳатланган футболчилари:
Нейдер Лосано, Алекс Мартинес, Карлос Нева, Кини (“Гранада”). Уссама Идрисси, Карим Рекик (“Севилья”).

17.10 19:00 (Тошкент вақти) “Сельта” – “Атлетико Мадрид”

“Балаидос” стадионида бўлиб ўтиши режалаштирилган ўйинга икки жамоа ҳам бир хил очкода етиб келишади. Аммо “Сельта”нинг мадридликлардан фарқи улар 2 ўйин кўпроқ ўтказишган. Ҳар икки жамоа ҳам 1 ғалаба ҳамда 2 дурангга эришган ва 5 очко қўлга киритган ҳолда турнир жадвалида орқама-кетин жойлашишган (“Атлетико” – 12 ўрин, “Сельта” – 13 ўрин).

Жамоаларнинг жароҳатланган футболчилари:
Рубен Бланко, Давид Хунка, Серхио Алварес, Кевин Васкес, Хосе Фонтан (“Сельта”). Ян Облак, Хосе Хименес, Дарио Поведа (“Атлетико Мадрид”).

Бу мавсум энг кўп қуруқ ўйин ўтказган дарвозабонлар

17.10 21:30 (Тошкент вақти) “Реал Мадрид” – “Кадис”

Турнир жадвалида пешқадамликни қўлга олган Мадриднинг “Реал”и 4 ўйиндан сўнг 10 очкога эга. Меҳмон “Кадис” эса 5 ўйин ўтказган ва 7 очко жамғарган ҳолда турнир жадвали ўрта чизиқларида кўриниш беради. Мазкур ўйиндаги “Кадис”нинг ғалабаси айнан “Реал” билан тенглашиб олиши ва ўз ўрнидан анча юқорига силжиш имкониятини беради.

Жамоаларнинг жароҳатланган футболчилари:
Эден Азар, Альваро Одриосола, Даниел Карвахаль, Эдер Милитао, Тони Кроос (“Реал Мадрид”). Луисми Кесада (“Кадис”).

17.10 00:00 (Тошкент вақти) “Хетафе” – “Барселона”

Ушбу баҳс турнинг марказий учрашуви бўлиши мумкин. Турнир жадвалига эътибор берадиган бўлсак ҳар икки жамоа ҳам бир хил 7 очкодан тўплаган. Мезбонлар меҳмонларга қараганда бир ўйин кўп ўтказган ва бир маратоба мағлубият аламини тотиб кўрган холос. Каталонияликларнинг “Хетафе” майдонига ўтказган сўнги баҳсларига қарайдиган бўлсак асосан кичик ҳисобларда ғалабага эришган. Устига устак асосий дарвозабони жароҳатда бўлган жамоага қийин бўлиши мумкин.

Жамоаларнинг жароҳатланган футболчилари:
Дарио Поведа (“Хетафе”). Марк-Андре тер Штеген, Самуэль Умтити (“Барселона”).

18.10 15:00 (Тошкент вақти) “Эйбар” – “Осасуна”

Сўнгги турда икки жамоа ҳам ғалабага эришган ва шу орқали ўз аҳволларини бироз бўлсада яхшилаб олишган. “Эйбар” 5 ўйинда атиги 1 марта ғалаба эришган бўлса шу ғалаба ҳам ўтган турда меҳмонда қўлга киритилди. “Осасуна” эса ҳозирча дуринг натижа қайд этганича йўқ (2 ғалаба, 2 дуранг). Гол уриш ва ўтказиш бобида икки жамоа ҳам мақтана олмайди (“Эйбар” 4-6, “Осасуна” 5-4).

Жамоаларнинг жароҳатланган футболчилари:
Педро Бигас, Серхи Энрик, Педро Леон, Хосе Анхел, Ресио (“Эйбар”). Дарко Брашанатс, Аридане Эрнандес, Чими Авила, Роберто Торрес (“Осасуна”).

Энг кўп голли узатма амалга оширган футболчилар

18.10 17:00 (Тошкент вақти) “Атлетик Бильбао” – “Леванте”

Турнир жадвалининг қуйи ўринларини эгаллаб турган икки жамоа қарама-қаршилиги. Юқорида “Хетафе” – “Барселона” баҳсини “марказий ўйин” деб атадик, аммо бу учрашув ҳам ундан қолишмайди. 4 ўйиндан сўнг атиги 3 очко тўплаган жамоалар. Гол уришдан кўра ўтказишни “ёқтириб” қолган жамоалар ўзаро қандай башлашади?! Бир статистикани келтирамиз: ўзаро ўтказилган 5 ўйиннинг 3 тасида бильбаоликлар ғалабага эришган бўлса, иккитасида “Леванте”. Бу ерда ҳам деярли тенглик.

Жамоаларнинг жароҳатланган футболчилари:
Унай Бенседор, Перу Ноалскоайн, Ибай Гомес, Оскар де Маркос, Эрай Алварес (“Атлетик Бильбао”). Оскар Дуарте (“Леванте”).

18.10 19:00 (Тошкент вақти) “Вильярреал” – “Валенсия”

Бу йил ўз даражасини кўрсата олмаётган “Валенсия” ўзидан 1 очко кўп тўплаган “Вильярреал”га қарши баҳс олиб боради 6-турда. Икки жамоа бу кунгача 5 тадан ўйин ўтказишди. Мезбонлар 8 очко билан 4-ўринни эгаллаган. Тўплар нисбати бироз ёмонлиги сабаб “кучли учлик”ка киролмаган. “Валенсия” эса 8-ўринда, тўпар нисбати: 7-7. Жамоаларнинг ўтган мавсумдаги ўзаро ўйинларига қарайдиган бўлсак бир мартадан ғалаба эришганларини кўришимиз мумкин ва энг қизиғи иккиси ҳам ўз майдонида ушбу ғалабани қўлга киритган.

Жамоаларнинг жароҳатланган футболчилари:
Рубен Пеня, Алберто Морено, Францис Коклен, Рамиро Фунес Мори, Алфонсо Педраса (“Вильярреал”). Денис Черишев, Габриел Паулиста, Эляким Мангала (“Валенсия”).

18.10 21:30 (Тошкент вақти) “Уэска” – “Вальядолид”

Икки жамоанинг бугунги аҳволига қарайдиган бўлсак 5 турдан сўнг ҳали бирор маротаба ғалабага эришишмаган. “Вальядолид” 2 дуранг, 3 мағлубият билан сўнгги ўринда. Майдон эгалари “Уэска” эса дурангларни бу мавсумда “севиб қолган” (4 дуранг, 1 мағлубият). Ўтган мавсумдаги “Уэска” майдонида бўлган баҳсда мезбонлар 4:0 ҳисобида зафар қучишган эди.

Жамоаларнинг жароҳатланган футболчилари:
Педро Лопес, Келечи Нвакали, Пабло Инсуа, Антонио Валера, Пабло Маффео (“Уэска”). Хоакин Фернандес, Рубен Алкасар, Кики Оливас (“Вальядолид”).

Тўпурарлар рўйхати

18.10 21:30 (Тошкент вақти) “Алавес” – “Эльче”

Турнир жадвалида ёнма-ён турган жамоаларнинг қарама-қаршилигига гувоҳ бўламиз. Ҳар иккиси ҳам 4 очкога эга. Бироқ очко жамғариш бўйича “Эльче” яхши натижа қайд этган (3 ўйин - 1 ғалаба, 1 дуранг, 1 мағлубият). “Алавес” ўтган турни ҳам ўз майдонида ўтган турни ҳам ўз майдонида ўтказиб ғалабага эришганди. “Мендисорроса” стадионида бўлиб ўтадиган баҳс муросасиз кечиши аниқ.

Жамоаларнинг жароҳатланган футболчилари:
Рубен Дуарте, Флорян Лежён (“Алавес”). Мигел Гарридо (“Эльче”).

18.10 00:00 (Тошкент вақти) “Бетис” – “Реал Сосьедад”

Яна бир қизиқарли бўлиши кутилаётган ва “кучли учлик”да кетаётган жамоаларнинг тўқнашуви. Орадаги фарқ 1 очко. Ушбу баҳсдаги бирор жамоанинг ғалабаси ва биринчи поғонадаги “Реал”нинг мағлубияти иккисидан бирини пешқадам қилиши мумкин. Статистикага назар солсак сўнгги турда “Бетис” меҳмонда “Валенсия”ни таслим этган бўлса (0:2), “Реал Соьседад” ўз майдонида “Хетафе”га ҳеч қандай имконият қолдирмади (3:0). Ўтган мавсумда “Бетис” майдонида бўлиб ўтган ўйинда 3:0 ҳисоби қайд этилган. Бу баҳсда ҳар икки жамоани ҳам фақат ва фақат ғалаба қониқтиради, очко йўқотиш эса эгаллаб турган ўрнини ҳам ўзгартириши мумкин.

Жамоаларнинг жароҳатланган футболчилари:
Диего Лайнес, Сидней, Дани Мартин, Клаудио Браво (“Бетис”). Игор Субелдия, Асер Илярраменди, Аднан Янузай, Хосеба Салдуа, Аритс Аранбарри, Лука Сангали, Хон Алдалур (“Реал Сосьедад”).

Оғабек Самисов тайёрлади