Миллионлар ўйини атрофидаги ҳаяжон ва эҳтирослар айни чўққисига чиққан маҳалда, мутахассисларнинг таҳлиллари ҳар қачонгидан ҳам муҳим аҳамият касб этмоқда. Ўзбек футболи мухлисларига яхши таниш бўлган, узоқ йиллар "Пахтакор" шарафини муносиб ҳимоя қилган сербиялик собиқ легионер, айни пайтда эса сайтимизнинг Жаҳон чемпионати бўйича махсус эксперти сифатида фаолият юритаётган тажрибали Боян Миладинович мундиал старти ва ҳамюртларимизнинг имкониятлари хусусида ўз мулоҳазаларини ўртоқлашди.
— Мен Ўзбекистон терма жамоасининг илк ўйинда ижобий натижа қайд этишига ишонаман. Тўғри, Колумбия терма жамоасида Жаҳон чемпионатларида қатнашиш борасида катта тажриба мавжуд. Бироқ ўзбек футболчилари ҳам ўз салоҳиятларини намойиш эта оладиган даражада кучли. Бундан ташқари, бош мураббий Фабио Каннаварода бу каби нуфузли мусобақаларнинг катта кўникмаси бор. У жамоа ўйинини қандай ташкил қилишни жуда яхши билади.
Мундиалнинг умумий манзараси ва фаворитларнинг имкониятлари ҳақида гапирар экан, эксперт қуйидагиларни таъкидлади:
— Чемпионат эндигина старт олди. Шу боис айрим етакчи жамоалар дастлабки натижалардан қатъий назар, ўзларини хотиржам тутмоқдалар. Уларда ҳали хатоларни тўғирлаб, спорт формасига кириб олиш учун етарлича вақт бор. Шунингдек, маҳаллий об-ҳаво омилини ҳам унутмаслик лозим.
Бразилия ва Испания — жуда кучли терма жамоалар.
Бразилияликлар 2002 йилдан буён бош совринни қўлга кирита олишмаяпти. Шу сабабли улар бу гал тажрибали "эски бўри"ни бош мураббий этиб тайинлашди. Жамоа ҳали бор кучини кўрсатгани йўқ. Испания ҳам ҳеч нарса йўқотмади. Уларнинг рақиби Кабо-Верде мусобақа дебютанти бўлишига қарамай, жуда яхши қаршилик кўрсатди. Шунга қарамай, Испания камида ярим финалгача етиб борса керак. Эслаб кўринг, 2010 йилги Жаҳон чемпионатида испанлар илк турда Швейцарияга, Аргентина эса 2022 йилда Саудия Арабистонига ютқазиб, якунда барибир чемпион бўлишганди. Охирги йилларда Марокаш терма жамоасининг ҳам сезиларли даражада кучайганини алоҳида эътироф этиш лозим.
Миладинович терма жамоа етакчиси Жалолиддин Машариповнинг таркибдаги ўрни ва унинг соғлиғи билан боғлиқ вазиятга ҳам тўхталиб ўтди:
— Жалолиддин Машарипов — Ўзбекистондаги энг иқтидорли ва энг яхши футболчилардан бири. У ўзини ҳар томонлама кўрсата олди ва ҳали ўз сўзини айтади. Билишимча, унда аввалдан жароҳат бор эди, яқинда эса умуртқа поғонасидаги диск чурраси ҳам панд берди. Шунга қарамай, Жалолиддиннинг майдонда, ҳатто захира ўриндиғида бўлишининг ўзи ҳам қолган футболчиларга катта руҳий устунлик бағишларди. Уни бемалол ўзбекистонлик Неймар деб аташ мумкин.
