Сайтимиз ижодкорлари футбол мухлисларини зериктириб қўймаслик мақсадида футболчилар билан боғланиб, интервью ташкил этмоқдалар. Жумладан бугун Яйпаннинг "Турон" клуби аъзоси Жавоҳир Соҳибов билан ташкил этилган интервьюни эътиборингизга ҳавола этамиз.
- Жавоҳир, "Турон" таркибига келиб қўшилганингизга ҳали кўп вақт бўлмади. Жамоага мослашиш жараёни қандай кечди?
- "Турон" жамоасига мослашиш жараёни мен учун қийин кечмади. Футболчилар билан тезда киришиб кетдик. Бизда айни дамда аҳил жамоа йиғилган.
- "Турон" жамоасининг ярим ҳимоя чизиғида рақобат қандай?
- Жамоамизнинг ярим ҳимоя чизиғида тажрибали футболчилар жам бўлган. Бу эса ўз-ўзидан рақобатни юзага келтиради. Мураббий албатта энг яхши тайёргарликка эга бўлган футболчини майдонга туширади. Яхши ўйин намойиш этмасангиз, ўз ўрнингизни йўқотиб қўйиш хеч гап эмас.
- ПРО-Лигада иштирок этиши кутилаётган 8 жамоанинг ҳеч бирини кучсиз деб бўлмайди.Нима деб ўйлайсиз, бу йилги мавсумда қайси жамоалар Суперлига йўлланмаси учун кураш олиб борадилар?
- Айтиб ўтганингиздек, ПРО-Лигада кучсиз жамоанинг ўзи йўқ. Шу сабабдан ҳозирча бирон нарса дейиш қийин, барчасии вақт кўрсатади.
- Агарда "Пахтакор" сизни яна ўз таркибига чорласа, жамоага қайтган бўлармидингиз?
- Айни дамда "Турон" жамоаси аъзосиман. Клубда футболчиларга яратиб берилаётган шароит мени қониқтирмоқда. Насиб бўлса "Турон" билан Суперлига йўлланмасини қўлга киритиб, "Пахтакор"га қарши ўйнашни мақсад қилганман.
- Жавоҳир Соҳибов учун қайси соврин муҳимроқ? Жамоавий ёки индувидиал?
- Футбол жамоавий ўйин. Индувидиал тарзда натижага эришиш қийин. Шундан келиб чиқса, мен учун жамоавий соврин муҳимроқ.
- Ўз вақтида сиз билан ёшлар терма жамоасида ўйнаган Элдор Шомуродов, Отабек Шукуров каби футболчилар эндиликда миллий терма жамоамиз сафида майдонга тушмоқдалар. Бу холат сизга қандай таъсир ўтказади?
- Улар учун хурсандман албатта. Келажакда кўрсатаётган натижалари бунданда юқори бўлишини тилайман. Вақти келиб улар билан миллий терма жамоамиз сафида ўйнашга умид қиламан.
- Кучли бешлик чемпионатларида ўйинлари сизга маъқул бўлган футболчилар борми?
- Ҳа, "Барселона" аъзоси Серхио Бускетснинг ўйинлари менга жуда ёқади. Унинг ўйинларини кузатиб, ўзлаштиришга ҳаракат қиламан.
- Келажакдаги масадларингиз қандай?
- Мақсадим ПРО-Лигада "Турон" билан ҳар бир учрашувда ғалаба қозониб, якунда Суперлига йўлланмасини қўлга киритишдан иборат. Жамоамиз мухлисларидан ҳар бир ўйинда бизни қўллаб-қувватлаб туришларини илтимос қилган бўлардим, барчаларининг оилаларига тинчлик-тотувлик тилайман.
Тимур Ибрагимов ёзиб олди.
