Интервью. Жаба Жигаури: “Фарғонада европача муҳит бўлди, учинчи гол қўлга текканди. Осиё жамоаларидан таклиф бор”

Дастлабки босқичда очколар йўқотган жамоа иккинчи даврада ишончли ўйинлар кўрсатиб, яхши натижаларга эришди. Шу жараён ва умумий мавсум ҳақида жамоанинг етакчиларидан бири – Жаба Жигаури фикрлари билан ўртоқлашди.

– “Нефтчи” билан ўйин ҳақида.

– Биринчи навбатда “Нефтчи”ни чемпионлик билан табриклайман. Уларнинг бунга муносиб эканига ишонаман. Ўйин оғир ўтди, рақиб юксак мотивация билан майдонга тушди.

– Стадиондаги атмосфера, мухлислар босими сезилмадими?

– Бу каби мухлисларга тўла стадионда ўйнаш ҳар бир футболчи учун орзу. “Нефтчи” учун бу ўйин амалда чемпионлик финали эди. Биз эса ўз салоҳиятимизни тўлиқ кўрсата олмадик. Лекин босим халақит қилмади – аксинча, Европа ўйинларидагига ўхшаш атмосферада ҳаракат қилдик.

– Ушбу ўйиндан олдин жамоада кучли мотивация борлиги айтилганди…

– Молиявий томонларни ошкора муҳокама қилиш тўғри эмас, бу жамоавий сиримиз. Лекин айта оламанки, “Қизилқум” ўз мотивациясига эга, чунки ўз услубига таянган ҳолда ўйнайди. Афсуски, кеча буни тўлиқ намойиш эта олмадик. Ҳакамлик ҳақида ҳам бир оғиз айтаман: учинчи гол қўлга теккани яққол кўринди. Аммо бу футбол – хатолар унинг бир қисми. Олдинда яна имкониятлар бор.

– Мавсум жамоа учун кутилганидек якунланяптими?

– Мавсумни ижобий баҳолайман. Биринчи даврада паст ўринларда эдик, иккинчи даврада янги мураббий билан ўйинимиз сезиларли яхшиланди. Ҳозирги кунда саккизинчи ўринни эгаллаш имкони бор. Албатта, кучли бешликни ҳам кўзлаган эдик, аммо умид қиламанки, кейинги мавсум натижаларимиз янада юқори бўлади.

– Икки мураббий орасидаги фарқлар натижага қай даражада таъсир қилди?

– Никола Лазаревичнинг ўз фалсафаси бор эди, аммо бу иш бермади ва жадвалда пастга тушиб кетдик. Нимада муаммо бўлганини аниқ айтолмайман. Кейин жамоани ёш мураббий қабул қилиб олди – у ҳали тажриба тўпламоқда, келажаги бор мутахассис, ҳали ўз сўзини айтади. Иккинчи даврада ўйинимиз қандай ўзгарганини ўзингиз ҳам кўрдингиз.

– Кейинги мавсум режалари?

– Яқин вақтларда клуб билан суҳбатлашаман. Қоламанми ёки йўқ – барчаси клуб режаларига боғлиқ. Шу билан бирга бошқа мамлакатлар ва Осиё жамоаларидан таклифлар бор. Ўзбек клублари ҳам қизиқиш билдиряпти. Яқин кунларда келажагим аниқлашади.