Клуб расмий баёнотига кўра, Франция иккинчи лигаси доирасидаги "Лаваль" билан дурангдан (2:2) сўнг, бир гуруҳ қуролланган шахслар жамоа қароргоҳига бостириб киришган.
"Жумадан шанбага ўтар кечаси ўзларини 'Ultrem' гуруҳи аъзолари деб таништирган шахслар, юзларига ниқоб таққан ҳолда ва қўлбола қуроллар билан клуб марказига киришган. Улар жамоанинг Лавалдан қайтишини кутишган. Бундай ҳаракатлар мутлақо қабул қилиб бўлмас ҳолат ва бутун клубни шокка туширди", — дейилади клуб баёнотида.
Маълум қилинишича, безорилар футболчиларни ҳақорат қилиб, ирқчилик руҳидаги гаплар айтган ва ўлим билан таҳдид қилган. Вазият назоратдан чиқиб кетмаслиги учун воқеа жойига ҳуқуқ-тартибот органлари чақирилган.
"Футболдаги эҳтирос — бу гўзал. Биз мухлисларнинг норозилигини тушунамиз, лекин ҳеч нарса таҳдид, ирқчилик ва ўлим билан қўрқитишни оқлай олмайди. Клуб ушбу ҳолат бўйича суд жараёнларини бошлайди. Биз фожиа юз беришини кутиб ўтирмаймиз", — дея қўшимча қилди "Реймс" вакиллари.
Эслатиб ўтамиз, "Реймс" ўтган мавсум якунларига кўра Лига 1 дан тушиб кетган эди. Айни дамда жамоа иккинчи дивизионда 30 та ўйиндан сўнг 5-ўринда бормоқда. Клуб 2025 йил декабрь ойида полиция ходими оғир жароҳат олганидан сўнг ҳам мухлисларни вазминликка чақирган эди, бироқ бу сафар "қизил чизиқ" босиб ўтилди.
