Фарҳод Тожиев: ОЧЛда "Локомотив"га ёрдам бермоқчиман

"Ўзимни анча яхши ҳис этяпман. Аввало "Локомотив" раҳбарларига ўзимнинг катта миннатдорчилигимни билдириб ўтсам. Оғир жароҳат олишимга қарамай, менга жамоанинг тўлақонли аъзоси сифатида қарадилар ва маошимни ўз вақтида бериб бордилар. Ундан ташқари икки маротаба Германияда бўлиб қайтдим. Барча харажатларни клуб ўз зиммасига олди. Бу эса менга қўшимча куч бўлди ва улар олдидаги вазифамни адо этиш учун тезроқ соғайишга ҳаракат қилдим. 2 ҳафтадан кейин югуришни бошлайман. 20 декабрдан кейин эса тўлиқ жамоа машғулотларида иштирок этишим мумкин", - дейди Тожиевларнинг кенжаси.

- Соғайиш жараёнида муаммолар бўлмадими?
- Аслида 1 ҳафта аввал қайтишим керак эди. Лекин ҳа деганда аҳволим ўнгланавермагач, шифокорлар яна бир бор жиддий кўрикдан ўтказдилар. Кейин ўзимни яхши ҳис қила бошладим. Оёғимдаги оғриқ ҳам йўқолди. Ўйлайманки, янги мавсумнинг илк ўйинларигача тайёр бўламан.

- ОЧЛда катта эҳтимол билан 1+2 йўлланмасига эга бўляпмиз...
- Йўғ-е? Унда биздан икка карра яхши тайёргарлик кўриш талаб қилинар экан. Гарчанд "Локомотив" билан шартномам якунига етган бўлса-да, бу жамоа раҳбариятининг олдида яхши ўйинларим билан жавоб қайтаришим керак. Улар оғир дамларда мени ташлаб қўйишмади. Шунинг учун бошқа жамоа ҳақида ўйламасдан, "Локомотив"ни ОЧЛ гуруҳ ўйинларига олиб чиқиш учун меҳнат қиламан.