“Дерби” олдидан мухлислар қандай фикрда?

Мазкур учрашувга жамоамиз мухлислари ҳам қизғин тарзда ҳозирлик кўришмоқда десак хато бўлмайди. Фарғонада ўтадиган баҳс олдидан фаол ишқибозлардан бири Фарҳод Умаралиев ва Мухтор Юсуфбаевлар ўз фикрларини билдиришди.

Ф.Умаралиев: - “Фарғонада бизни ажойиб учрашув кутиб турибди. “Навбаҳор” меҳмонда тўп суришига қарамай футболчиларимизни “Истиқлол” ўйингоҳида ёлғизлатиб қўйиш ниятимиз йўқ. Бугунги кунда минглаб наманганликлар Фарғонадаги учрашувни бевосида ўйингоҳда кўришни ўз олдиларига мақсад қилиб қўйишган. Барчага маълумки, биз мухлислар “Навбаҳор”ни ҳар томонлама қўллашга одатланганмиз. Иккинчи даврани қаторасига икки ғалаба билан бошлаган жамоамизга “Нефтчи” билан ўтадиган учрашувда ҳам омад тилаб қоламан. Ўз навбатида футболчиларни меҳмондаги ўйинда муносиб тарзда тўп суришлари учун қўлимиздан келганича қўллаб-қувватлаймиз. Айнан шу мақсадда турли хил усулллар ва шиорларни ўйлаб топган ҳолда тайёргарлик кўрмоқдамиз. Бу борада яқинда ташкил этилган мухлислар клуби сардорлари ишқибозларга яқиндан ёрдам беришади”.

М.Юсуфбаев: - “Биз наманганлик мухлисларни “Навбаҳор” иккинчи давранинг дастлабки икки учрашувида ғалаба қозониб, бенихоя хурсанд қилди. Ғалабаларимизни бардавом бўлишида, ишқибозларимиз жамоага чин маънода қўшимча куч бўла олишади. Бежизга мухлисларни майдондаги 12-ўйинчи деб айтишмайди. Фарғонада ўтадиган баҳсда ҳам “Навбаҳор”нинг чин маънодаги 12-ўйинчиси бўламиз деган умиддаман. Бу йўлда барча “Навбаҳор” мухлисларини бирлашишга ва жамоани ҳамжиҳатликда қўллаб-қувватлашга чақираман. Ҳамма биладики, “дерби”лар доимо муросасиз руҳда ўтиб келган. Ўз навбатида бундай қарама-қаршиликларда мухлисларнинг қўллаши ҳам футболчиларга қўшимча куч бағишлайди. Минглаб, наманганлик мухлислар “Навбаҳор”ни “Нефтчи” майдонида қўллаш учун Фарғонага боришади. Ишончим комилки, футболчиларимиз биз мухлисларнинг хатти-ҳаракатига жавобан чиройли ва мазмунли ўйин намойиш этиб, барчани хурсанд қилишади”.