Даврон Файзиев: «Динамо»га ёрдам бериш учун келдим»

«Икки кун олдин «Динамо» клуби раҳбарияти таклиф билан чиқишганида, ўйлаб кўриш учун вақт олгандим. Сабаби, жамоада тажрибали ва малакали мутахассислар ишлаётгандилар. Ҳозирдан айтишим керак, мен жамоага бировни ўрнини олиш учун эмас, имконқадар ёрдам бериш учун келдим. 

Барчамиз биргалашиб мақсад сари ҳаракат қиламиз. Бугун жамоага келганим учун, ҳали машғулот ўтказишга ҳам, жамоани тўлиқ ўрганишга ҳам улгурмадим. Жамоа ўйинини илк бор кузатиб, баҳо бериш қийин бўлсада, барча сингари футболчиларнинг бугунги ҳаракатидан ҳам, натижадан ҳам қониқмадим. Ўйин назорати тўлиқ «Динамо»да бўлсада, «Хоразм» битта вазиятидан гол уриб, ўйин якунигача ҳимояланди ва очкони қўлга киритди. Суперлигани мақсад қилган эканмиз, бундай баҳсларда 3 очко олишимиз шарт. Қолаверса, бугун жамоада иштиёқ ҳам кучли эмасдек кўринди. 

Қатор голли вазиятлардан ҳам фойдалана олмадик. Эртадан жамоа билан тўлиқ ишга киришиб, вазиятни ўнглашга интиламиз» - дейди «Динамо» янги бош мураббийи Даврон Файзиев.