Бу йил “Бунёдкор-W” Осиё чемпионатида иштирок этади, 2023 йилдан аёллар ўртасида ОЧЛ ўтказилади

Унда 4 та иштирокчи жамоа ғолиблик учун баҳс олиб боради. Мусобақада “Амман ФК” (Иордания), “Шаҳрдари Сиржан” (Эрон), “Гокулам Керала ФК” (Ҳиндистон) билан бир қаторда Ўзбекистоннинг амалдаги чемпиони “Бунёдкор-W” иштирок этади.

Мазкур мусобақа Ғарбий Осиё жамоалари ўртасида биринчи марта ташкил этилмоқда. Шарқ минтақасида эса мезбон масаласи ҳал этилмаган.

Қайд этиш жоиз, ОФК жорий йилдан эътиборан аёллар жамоаларини ривожлантириш масаласига жуда жиддий аҳамият бермоқда. Хусусан, бу йил илк бора аёллар жамоалари ҳам синов тариқасида лицензиялашдан ўтказилмоқда ва Ўзбекистон кам сонли аъзо мамлакатлар қаторида аёллар клубларини ҳам лицензиялаш жараёнига жалб этди. 2022 йилдан эътиборан мазкур жараён барча қолган аъзо давлатларда ҳам мажбуран татбиқ этилади. 2023 йилдан бошлаб эса аёллар жамоалари ўртасида тўлақонли Осиё Чемпионлар лигаси ташкил қилинади ва унда фақат лицензия олган клубларгина иштирок этади.