Ботир Носиров: “Ҳар қандай ҳолатда ҳам “Машъал”нинг режалари ва мақсадлари ўзгармайди”

Учрашувдан сўнг муборакликлар дарвозабони Ботир Носировнинг фикрларига қулоқ тутдик.

- Жуда қизиқарли ўйин бўлди, - дея сўз бошлади Носиров. Ўйинга астойдил тайёргалик кўрдик. Рақибнинг кучидан келиб чиқиб, машғулотларда турли тактикалар устида ишладик. Бевосита ўйинга тўхталсам, бундай жанговар ўйин бўлиши кутмагандик. Йигитларга раҳмат, улар охиригача курашди. Аввалги турдаги мағлубиятдан сўнг бу учрашувда яхши натижа кўрсатмасак, мухлисларимиз олдида уятли бўлиб қолардик. Шуни инобатга олиб сўнгги дақиқаларга қадар майдонда боримизни бердик.

Кутилмаган жароҳат туфайли майдонга тушиши борасида

- Тўғриси, кутилмаган ҳолат рўй берди. Асосий дарвозабонимиз Шохрух Эшбўтаев ўйин аввалидаги машғулотлар пайтида тиззасидан жароҳат олди. Натижада, ўйинда иштирок эта олмаслиги ойдинлашганидан сўнг менга имконият берилди. Мен учун бу кутилмаган ҳолат бўлди. Икки маротаба тўп олиб чиққаним кишини хафа қилади.

Мавсум якунига қадар қўйилган мақсадлар тўғрисида

- Бизнинг жамоа доимо ўз олдига юқори мақсадларни қўйган. Ҳар қандай ҳолатда ҳам “Машъал”нинг режалари ва мақсадлари ўзгармайди. Бизни пастки лигага тушириб юборган вақтида ҳам ҳеч қачон тушкунликка тушмасдан, олдимизда қўйилган мақсадлар сари босқичма-босқич қадам ташладик. Жорий мавсумнинг қолган учрашувларида, мухлисларимизни ғалабаларимиз билан хурсанд қилмоқчимиз. Таркибимиздан бир нечта етакчи футболчиларимиз тарк этгани ҳам ўз таъсирини кўрсатмоқда. Асосан академиямиздан чиққан йигитлар тўп тепмоқда. Улар ёш, ҳозирда Суперлигадаги ўйинлари орқали маҳоратларини ошириб бормоқда. Шунга қарамай, ўйиндан-ўйинга натжаларимиз яхшиланиб боришига ишончим комил.