"Арал"нинг 20 ёшли вингери, пешқадамни ютган мураббий ва Муборакдаги "қалқон" — Про лига 4-тур лауератлари

"Championat.asia" сайти талқинига кўра, 4-турнинг энг яхши дарвозабони - Умиджон Ҳамроев ("Машъал")

"Машъал" бу турда ўз майдонида "Шўртан"ни қабул қилди. Қашқадарё дербисида Асрор Алиқулов шогирдларининг қўли баланд келди. Шу куни ғузорликлар ҳам мезбонлар дарвозаси олдида бир нечта хавфли вазиятларни яратди. Лекин уларнинг голга айланишига "Машъал" посбони Умиджон Ҳамроев йўл қўймади ва бир нечта сейвларни амалга оширди. Маълумот учун, "Машъал" жорий мавсумда ҳали ўз дарвозасидан гол ўтказиб юборгани йўқ. 

 "Championat.asia" сайти талқинига кўра, 4-турнинг энг яхши футболчиси - Иззатилла Қутибоев ("Арал")

2004 йилда туғилган Иззатилла Қутибоев бу йил "Арал" сафида ўзининг чаққон ҳаракатлари, индивидуал сифатлари билан ажралиб турибди. Футболчини "Олимпик Мобиуз"га қарши кечган ўйинда ҳеч ким тўхтата олгани йўқ. У рақиб дарвозасини ишғол қилишдан ташқари жамоадошларининг 2 та голига ассистентлик ҳам қилди. 

"Championat.asia" сайти талқинига кўра, 4-турнинг энг яхши мураббийи - Муҳсин Низомиддинов ("Қўқон-1912")

"Қўқон-1912" Фарғонада турнир жадвали пешқадами "Хоразм"ни қабул қилди. Қизиқарли кечган учрашувда Муҳсин Низомиддинов шогирдлари йирик ҳисобдаги (3:0) ғалабани тантана қилди. Сайтимиз талқинига кўра, айнан Низомиддинов турнинг энг яхши мураббийи сифатида тан олинди.