Андрей Шипилов: "Танаффусдаёқ 2-3 нафар футболчини алмаштиришимиз керак эди"

- Ўйин ҳақида фикрингиз?

- Жуда ҳаяжонли ва оғир ўйин бўлди. Биринчи таймда ўйлаган режамиз амалга ошди. "Пахтакор"га бизга кўп муаммо туғдирмади. Танаффусдаёқ 2-3 нафар ўйинчини алмаштиришимиз керак эди, бу эса менинг хатойим бўлди. Иккинчи таймда нималар содир бўлди, ҳайронман. Биз ҳалиям кийим алмаштириш хонасида қолиб кетгандек тасаввур уйғонди. Нима бўлган тақдирда ҳам футболчи алмаштиришимиз керак эди. Майдонда ўн киши қолиб ҳам гол урдик, фақат шу хурсанд қилди.

- Аввалги баҳсда ҳам, бугун ҳам Жавоҳир Сидиқов билан Шоҳруҳ Гадоевнинг ўйини чиқмади. Уларга эътирозингиз борми?

- Тўғри савол бердингиз. Улар ҳам ҳаракат қиляпти, улар ҳам одам. "Бухоро" билан баҳсда уларни алмаштиргандик. Бу икки футболчимиз ўз даражасини ҳали 50 фоиз ҳам кўрсата олгани йўқ. Бу нима билан боғлиқ эканини билмайман. Биз доим футболчиларни назорат қилиб турамиз. Ўйин охирида кўрсатган ўйинимизни баҳс давомида кўрсатишимизни хоҳлагандим. Ҳаммасини таҳлил қиламиз.

- Ҳакам "Пахтакор" ўйинчисига қизил карточка кўрсатиб, кейин бекор қилинди.

- Қизиқ саволлар беряпсиз, бу саволга ҳам жавоб бериш ёқимли. Ҳакамлар қўмитаси қарорини бир-икки кун кутишимизга тўғри келади. Бу ҳолатни нима деб изоҳлашлари менга ҳам қизиқ. Бунгача рақибнинг 4-рақамли футболчиси тўпни қўли билан ўйнаганди, лекин шу вазиятга негадир ҳеч ким эътибор бермади. Сиз айтган вазиятни эса синчиклаб кўришди. Айтиб ўтганимдек, қўмита фикрини кутамиз. Мен ўйин тугаши билан рўй берган воқеани кўра олмадим, шу боис аниқ бир гап айтишим қийин. Вазият оғир, лекин ҳаммасини ўнглашга ҳаракат қиламиз.