"Ал Дуҳайл": Накажима келди, Нам Тай Хи кетди

Томонлар тўрт ярим йил муддатга шартнома имзолашди. 24 ёшли ҳужумкор ярим ҳимоячи Қатар клубига ўтганидан ўз хурсандчилигини яширмади: "Фаолиятимда янги чақириқлар бўлишини истайман, шу боис "Ал Дуҳайл" билан шартнома имзоладим. Менга клуб 10-рақамли либосни тақдим этди. Мен ҳам шунга мос ўйин кўрсатишга ҳаракат қиламан".

Сал аввалроқ "Ал Дуҳайл" "Ювентус"дан Медҳи Бенатияни харид қилганди. Мана энди япониялик футболчи билан ўз сафини янада кучайтириб олди. Япон футболчиси келаётганидан хабар топган кореялик ярим ҳимоячи Нам Тай Хи эса жамоани тарк этди. У "Ал Дуҳайл"нинг асосий рақобатчиси "Ал Садд"га ўтиб кетди. Ярим ҳимоячи айни пайтда жароҳатини даволаяпти. Шундан сўнг майдонга тушишни бошлайди.

Маълумот учун, Нам Тай Хи 2012 йилдан бери "Ал Дуҳайл"да тўп тепиб келаётганди ва бу вақт оралиғида беш марта чемпионлик ҳамда икки бор Амир Кубогини қўлга киритган. Қолаверса 2017 йилнинг "Энг яхши футболчиси" деб топилган. Ушбу футболчи ўз терма жамоаси сафида 44 бор майдонга тушган. Нам Тай Хи "Ал Садд"да ҳамюрти Жунг Ву Ёнг билан бирга ўйнайди.