Абдуқаҳҳор Маъруфалиев: “Бошланғич таркибда Насимовга ишонч билдирилса керак”

Айтиш керакки, Маъруфалиевга ҳам футболчиларнинг орзуси бўлмиш, миллий терма жамоа либосини кийиш насиб қилган. 1992 йилдан 2001 йилга қадар миллий терма жамоа мураббийлари эътиборида турган Абдуқаҳҳор Маъруфалиев бош жамоамиз сафида 32та учрашувда иштирок этиб, рақиблар дарвозасига 5 бор йўл топа олгани билан тарих зарварақларидан жой эгаллади. Шу боис Иордания билан ўйин олди навбатдаги суҳбатдошимиз, Маъруфалиев бўлди.

“Аввало миллий терма жамоамизга сафардаги ўйинда омад тилайман. Табиийки мен ҳам халқимиз орзиқиб кутаётган ғалабани кутяпман. Ўйлайманки йигитларимиз бунга қодир. Бугун Спорт ТВда ўйинни 21:00да олиб кўрсатилиши тўғрисида реклама қилиняпти. Шу боис учрашувни ойнаи жаҳон орқали кўриб бўлсада, футболчиларимизни қўллаб қувватлаймиз”.

“Фикримча Амманда кечадиган баҳсда 1:1 ҳисоби қайд этилса керак. Сафарда гол уришимиз жуда аҳамиятли. Ғалабами ёки дуранг натижами, муҳими сафардан қониқарли натижа билан қайтишдир”.

“Бугунги ўйинда мураббийлар штаби ҳужум чизиғига бошланғич таркибда Баҳодир Насимовни қўйса керак. Чунки ўзингизга яхши маълумки, Насимов охирги марта Тошкентда ўтган ўйинда захирадан тушган бўлишига қарамай, гол уришни уддалаганди. Бақоев ҳам чакки эмас. Унда ҳам имконият яхши. Менимча Улуғбекни иккинчи таймда ўйинни янада кучайтириш учун туширса керак. Бунга ўйин давомида гувоҳ бўламиз”.


Исломбек Рустамбеков суҳбатлашди