Тимур Кападзе: "Бизнинг ўйинчилар рақибдан ҳар тарафлама кучли эди"

- Ўйин ҳақида фикрингиз қандай? Кўпчилик йирик ҳисобдаги ғалабани кутганди. Шундай ҳам бўлди...

- Ғалаба билан ҳаммани табриклайман. Сизга балки кутилган ғалабадир, аммо биз тайёргарлик кўрдик. Албатта, Афғонистон терма жамоаси ҳақида маълумот тўплашга ҳаракат қилдик, аммо бунинг иложи бўлмади. Ўйиндан олдин бу жамоанинг ўйинлари бизга қоронғу эди. Улар яхши курашишди. Бизнинг ўйинчилар рақибдан ҳар тарафлама кучли эди. Ўйин ҳам буни исботлади. Кейинги ўйинларга тайёргарлик кўрамиз.

- Эрон ва Гонконг ўртасидаги ўйинни кўришга улгурдингизми?

- Йўқ, аммо ёрдамчиларим бу ўйинни кузатишди. Учрашувнинг видео тасвирларини кўриб чиқамиз. Уларнинг олдинги ўйинларини кўрганмиз. Бу учрашувга тўғри тайёргарлик кўрамиз. Иккала рақиб ҳам кучли жамоа.

- Эрон термаси вакиллари ўйинни кузатиб боришди, видеоёзувларга ҳам муҳрлашди. Эронликларни ўзаро учрашувда қандай хайрон қолдирмоқчисиз?

- Икки жамоа ҳам бир-бирини ўрганади. Бу тушунарли ҳолат. Бизнинг мураббийлар ҳам уларнинг ўйинларини томоша қилишди. Бу масалага ўзаро ўйиндан бироз аввал қайтамиз. Ҳозир Гонконгга қарши ўйинга бор эътиборимизни қаратамиз. Эрон албатта кучли жамоа. Кўрамиз, ҳамма саломат бўлса, асосийчи шу.

- Биринчи бўлимда жамоа хотиржамликка берилди. Ҳимояда ҳам хатолар кузатилди. Бунга сабаб нима бўлди?

- Хотиржамлик демаган бўлардим. Биринчи ўйин бўлганлиги сабаб ҳаяжон бор эди. Бошида шундай бўлиш эҳтимоли бор эди, аммо барибир яхши ҳаракат қилдик, деб ўйлайман. Хатолар ҳам бор, уларни ўрганиб чиқамиз.

- Терма жамоа таркибидаги ўйинчилар жуда яхши даража. Кейинги ўйинларда таркибда ротация кўришимиз мумкинми?

- Бугун менинг асосий вазифам Афғонистонни мағлуб этиш эди. Бундан ташқари, кўп ўйинчилар ўз клубларида ўйнашмаяпти. Шу сабабдан ҳам уларга ўйин амалиёти бериб, бироз тонусга келтирмоқчи эдим. Кимдир битта тайм ўйнади, кимдир кўпроқ. Кейинги ўйинларда ҳам албатта ротация бўлади. Биз бундай рақиблардан кучлироқмиз. Шу сабабдан ҳам ротация қилишга имконимиз бор.