Рўзиқул Бердиев: "Ғалаба учун нафақат яхши ҳимояланиш, балки ҳужумга эътибор қаратиш ҳам муҳим"

Бугун ўйинолди матбуот анжумани бўлиб ўтди ва унда "Насаф" бош мураббийи Рўзиқул Бердиев ҳамда жамоа кипери Абдувоҳид Неъматов иштирок этди.

"Ассалому алайкум! Бу мусобақада ҳам олдимизга жиддий мақсад қўйганмиз - кейинги босқичга ўтиш. Бунинг учун эртанги ўйинда ҳам максимал ҳаракат ва 3 очко талаб этилади. Рақибимизни биз биринчи ўйин орқали жуда ҳам яхши биламиз, анча жиддий жамоа. Ўйлайманки, ўйинга етарлича тайёргарлик кўрдик. Йигитлар буни тушуниб турибди. Эртанги ўйинда керакли натижа учун бор кучимизни берамиз. Албатта, мухлисларни хурсанд қилиш учун ҳамда вазифамизни енгиллаштириш учун ғалабани кўзлаб майдонга тушамиз" - деди Рўзиқул Бердиев.

"Ассалому алайкум. Эртанги баҳсга ҳамма тайёр. Биз фақатгина 3 очко учун майдонга тушамиз. Кейинги босқичга чиқиб, мураббийимиз таъкидлаганидек, мухлисларимизни хурсанд қилмоқчимиз", - деди Абдувоҳид Неъматов.  

"Чемпионлар Лигасидаги ўйинлар ҳар бир мамлакатнинг етакчи жамоалари иштирок этади. Қуръадан кейиноқ биз кучли рақибларга дуч келишимиз маълум эди. Уларнинг ҳар бири ўз мамлакатининг етакчи клублари. Шундай бўлса ҳам, улар биздан анча кучли демаган бўлардим. Ҳар бир ўйинда исталган рақибдан сюрприз кутиш мумкин. Ҳар хил тактик ўйинларни кутиш мумкин, балки рақиб жамоаси эртага дурангни кўзлаб ҳам майдонга тушиши мумкин. Биз барчасига тайёрмиз. Биздан талаб қилинадиган нарса — фақат ўйинга максимал ҳаракат қилишимиз ва ғалабани ўйлаб майдонга тушишимиз керак. Бунинг учун ақл, куч ва меҳнат талаб қилинади. Умид қиламанки, бизда бу борада муаммо бўлмайди. 

Аввалги тўқнашувда ҳамма кўрди, уларнинг таркибида индивидуал кучли футболчилар бор. Аввалги икки ўйинни кўриб, ўрганганимизда ҳам бунга эътибор қаратгандик. Йигитларга қанчалик уқтирмайлик, биз сусткашликка йўл қўйдик ва индивиудал ҳаракат эвазига ўз дарвозамиздан 2 та гол олиб чиқишга мажбур бўлдик. Шу сабабли, бемалол айта оламан, ҳозир рақибнинг таркиби, салоҳияти ҳақида гап кетди, лекин биринчи ўринда уларнинг баъзи бир футболчилари, ҳужум вакилларининг индивидуал маҳоратини жамоанинг кучли томони, деб биламан. 

Албатта, таркиб фарқ қилади. Биласизлар, Иорданияга бориш сафари оғир эди, бизни эса Самарқандда муҳим ўйин кутаётганди. Шу сабабли ротацияга қўл урдик. Улар ёмон ўйнади демоқчимасман, лекин эртага сафарда йўқотилган уч очкони қайтаришга ҳаракат қиламиз. 

Замонавий футболда яхши ҳимояланиш талаб этилади. Албатта, ғалаба қозонмоқчи бўлсангиз бу муҳим, яхши ҳимояланишингиз зарур. Аммо эртага биздан кўпроқ талаб қилинадиган нарса бу ҳужумга эътибор қаратиш. Ғалаба қозонмоқчи бўлсак, албатта, рақиб дарвозаси томон йўл топишимиз керак"

Абдувоҳид Неъматов - "Бу ўйинни интиқлик билан кутдик. Иорданияда ўйиннинг охирги дақиқаларида гол ўтказиб юбордик. Шу сабабли ҳам айтганимдек, фақат ва фақат ғалаба учун майдонга тушамиз".

Эртага пенальти тепиш керак бўлса, яна дарвозабонга ишонч билдириладими? 
"Пенальтини яхши тепа оладиган бир нечта футболчиларимиз бор. Баъзи бир футболчиларимиз ишончни оқлай олмади. Бошқалари аксинча, муҳим паллаларда панд бермади. Мавсум давомида бир неча бор бунинг гувоҳи бўлдик. Ўйлайманки, эртага ҳам керак бўлса, ўзига ишонган футболчи, ишончни оқлай оладиган футболчи чиқади" - деди "аждарлар" устози.