ПСЖ Луис Энрике билан уникал шартнома имзоламоқчи. Вазият аслида қандай?

2025 йилда унинг бошчлигидаги ПСЖ деярли барча мусобақада зафар қучди: Чемпионлар Лигаси, Франция чемпионати, Кубоги ва Суперкубоги, ундан ташқари УЕФА Суперкубоги ва Қитъалараро кубок. Парижликлар еттинчи совринни ҳам ўзларини қилишлари мумкин эди, бироқ Клублар ўртасидаги ЖЧ финалида "Челси"га имконият бой берилди (0:3).

Раҳбарият мураббийнинг ишидан шу қадар мамнунки, унга умрбод шартнома таклиф қилмоқчи. Бу ҳақида Испаниянинг AS нашри хабар берди.

Уникал ҳолат

Ёдингизда бўлса керак, Луис Энрике 2023 йилнинг ёзида ПСЖ бошқарувини қўлига олганди. Мураббийнинг амалдаги шартномаси 2027 йилнинг ёзигача мўлжалланган, бироқ клуб босслари узоқ муддатли режаларни барчасини амалга ошириш учун бир ярим йил камлик қилади, деб ҳисоблашмоқда.

Раҳбарият барча муҳим масалаларда мутахассисни тўлиқ қўллаб-қувватлайди. Қўлга киритилган совринлар эса танланган йўл тўғрилигини кўрсатмоқда.

Маълумотларга кўра, Дохада ўтган Қитъалараро кубок финалидан кейин ПСЖдагилар испанияликка чинакамига уникал таклиф билдириш ҳақида ўйлаб қолишган.

"Клубда испаниялик билан умброд шартнома имзолаш ҳақида ўйлашмоқда", — таъкидланади материалда.

"Бизнинг мақсадимиз — ғалаба"

Ҳозир Луис Энрике 55 ёшда. Назаримизда, у чиндан ҳам ҳали анча узоқ вақт Парижда фаолият олиб бориши мумкин — ҳар ҳолда Энрике ҳеч қаерга кетиш ниятида эмас.

"Олти соврин — ёмон эмас, — табассум билан гапиради Энрике "Фламенго"га қарши ўйиндан кейин. — Бу ғалаба шуни билдирадики, кейинги йил бизнинг либосимизда яна бир соврин акс этган бўлади. Биз ўтган мавсумда бўлгани каби ажойиб ўйин кўрсата олдик. Мақсадимиз ўзгармайди — энг яхши ўйинимизни кўрсатиб, ғалаба қозонишда давом этмоқчимиз", — дея мураббий сўзларидан иқтибос келтиради "Canal Supporters".

Шубҳасиз, охирлаб бораётган йил ПСЖ тарихидаги энг яхшиси бўлди. Энрике қўл остида жамоа тубдан ўзгармоқда: янги ёш футболчилар очилиб бормоқда, жамоа етакчиси Килиан Мбаппенинг "Реал"га кетишини ҳам клуб нисбатан осон бошдан ўтказди. 

"Парижда барча менга миннатдорчилик билдирмоқда, лекин бу менинг ишим. Биз учун бундай клубда ишлаш шараф ва шу йўсинда меҳнат қилишда давом эттиришимиз зарур. Ажойиб йилни ўтказдик, бироқ бугун кун ва келажакни ҳам унутмаслик муҳим", — деди мураббий клуб матбуот хизматига берган интервьюсида.

ПСЖ футболчилари индивидуал совринларга ҳам эга бўлишди. Усмон Дембеле "Олтин тўп" соҳибига айланган бўлса, Дезире Дуэ "Golden Boy" совринига лойиқ кўрилди. Бундан ташқари, айнан "Фламенго"га қарши ўйинда серияда қаторасига 4 та пенальтини қайтарган Матвей Сафонов ФИФА рекордини ўрнатди.