Оливер Шаркич: "Биз чемпионлик учун лойиқ жамоамиз"

Биз эса фурсатдан фойдаланиб, "Пахтакор" жамоасининг черногориялик футболчиси Оливер Шаркич билан суҳбатлашдик.

-Сиз охирги турларни ўтказиб юборишингизнинг сабаби нимада?

-Июнь ойида "Олимпик"га қарши ўртоқлик учрашувида жароҳат олган эдим. Муррабий жароҳатимдан тикланишим зарурлигини айтганди.

-Ҳозирги кунда Суперлигада таннафус. Бўш вақтингизни қандай ўтказмоқдасиз?

- Дам олишга умуман вақт йўқ. Чунки жароҳатдан тикланиб, яҳши жисмоний ҳолатимга қайтишим керак. Шундан сўнг, августдаги биринчи учрашувга тайёр бўлишим шарт.

- Славче Войнескини клубдан кетиши ҳақида фикрларингиз?

- Ўйлашимча, у клуб билан нимагадир эришиш учун қўлидан келганини қилди. Футболда ҳамма нарса тез рўй беради. Мавсумни Суперкубокни ютиш билан бошлаб, мавсум ярмида истеъфога чиқиш - бунинг барчаси футбол.

-Максим Шацкихни жамоага келишига муносабатингиз қандай?

-Славчега менга имконият бергани учун раҳмат айтиб қоламан. Клуб ҳозир унинг ўрнига ўзбек футболи афсонаси ва собиқ ажойиб ҳужумчи Максим Шацкихни олиб келишга қарор қилди. Умид қиламанки, биз бирга яҳши ишлаб, катта марраларни забт эта оламиз.

-Максим Шацкихни жамоа муррабийига айланиши режаларингизга таъсир қиладими?

-Менинг режам - жамоага қўлимдан келганча ёрдам бериш. Мавсум охиригача шартномам бор, уёғини вақт кўрсатади.

-Сизга қайси позицияда ўйнаш қулайроқ?

-Мен учун ҳужумда ўйнаш қулайроқ, чунки мен кўп гол уришни ёқтираман. Аммо ўзимни хужумкор ярим ҳимоячи ролида ҳам яхши ҳис қиламан. Фаолиятим давомида ҳимоядан ташқари ҳамма позицияда ўйнаганман. Бироқ, менга кўпроқ ҳужумда ўйнаш ёқади.

-Бу йилги мавсумда қайси жамоалар чемпионлик учун фаворит деб ўйлайсиз?

-Тўғрисини айтсам, ҳамма жамоалар ажойиб ўйин кўрсатишмоқда. Охирги ўйинларда бизга омад етишмади ва 90-дақиқадан сўнг очко йўқотишни бошладик. Ўйлашимча, биз чемпионлик учун лойиқ жамоамиз.

-Менда бор маълумотларга қараганда, сиз Виктор Линделёф билан бир жамоада ўйнаган экансиз...

-Албатта, мен Юрий Тилеманс, Рубен Диаш, Ренато Санчеш ва Жоау Фелиш каби футболчилар билан ҳам бир жамоада ўйнаганман.

-Қайси машҳур футболчиларга қарши майдонда тўп сургансиз?

-Ўтган мавсумда собиқ жамоам билан "Манчестер Сити"га қарши ўйнагандим.

-Муҳлисларга тилакларингиз...

-Бизни қуллаб-қуватлашларини сўраган булар эдим. Биз улар учун майдонда боримизни бериб, чемпион бўлишга харакат қиламиз.

Учқун Азимов суҳбатлашди.