ЎФА раҳбарияти Тошкент вилояти ҳокими, вилоят футбол ассоциацияси раҳбари Даврон Ҳидоятов билан учрашди

Равшан Эрматов Тошкент вилояти ҳокими, вилоят футбол ассоциацияси президенти Даврон Ҳидоятов билан мазкур ҳудудда йирик халқаро спорт мусобақаларини қабул қилиш имкониятларини муҳокама қилишди. Вилоятнинг футбол ва умуман спорт борасидаги имкониятлари улкан эканлиги учрашув давомида алоҳида таъкидланди.

Ушбу ташриф мобайнида ЎФА мутасадди ва мутахассислари вилоят футбол ассоциацияси иш фаолияти, футбол инфратузилмаси ва мавжуд шарт-шароитлар билан танишиб чиқди. Вилоят миқёсида болалар футболининг инфраструктураси юзасидан фикр алмашилиб, болалар-ўсмирлар футбол лигалари мусобақаларини юқори савияда ўтказиш муҳимлиги таъкидланди.

Тошкент вилояти футбол академияси ва Чирчиқ Олимпия захиралари коллежида қурилиш-реконструкция ишларини жадаллаштириш, сифатли футбол майдонларини барпо этиш ҳамда замон талабларига мос равишда жиҳозлаш каби масалалар бўйича таклифлар билдирилди.

Шунингдек, Тошкент вилоятида Ўзбекистон Республикаси мустақиллигининг 30 йиллигига бағишланган мини-олимпиадани ташкил этиш ва уни ўтказиш масалалари муҳокама этилди. Бу ёш спортчилар учун унутилмас тадбир бўлиши таъкидланди.