Одил Аҳмедов билан янги мавсум олдидан

Ҳар мавсум якунида Аҳмедов офисимизда меҳмон бўларди, бу сафар суҳбатимиз қисқа ва асосан якунига етган мавсумга оид бўлди.

ХИТОЙДАГИ ФАОЛИЯТИ ҲАҚИДА

Аслида янги йилдан жамоам сафига бориб қўшилишим керак эди. Лекин, жамоамизда мураббий алмашиб, режалар ҳам ўзгарди. Клубимизда кичик ўзгаришлар бўлди, Карвалью жамоа сафини тарк этди. Умуман олганда, янги мавсум олдидан янги мураббий ва барчаси янгидан бошланади. Чемпионлар лигасига ҳозирлик кўришимиз керак, бу сафар финал мақсад қилинаяпти. Ортда қолган мавсумда бироз омад етишмади. Жамоамиз янги шаклланаётганини ҳам унутмаслигимиз лозим. Айнан шу нарса "Гуанджоу"га чемпионликда қўл келди. Рақибимиз анча йилдан бери бир таркибда ўйнаб келаётганди.

ЎЗБЕКИСТОНДАГИ ЯНГИЛИКЛАР ҲАҚИДА

Мени қувонтирган ҳолат, олий лигада бўлаётган ўзгаришлар. Сўнгги йилларда терма жамоа сафига олий лигадан қўшилаётган футболчиларнинг сифатини кўриб ачиниб кетдим. Мен 25 ёшда олий лигадан кетдим, 25 ёшимгача у ерда ўсишим мумкин эди. Ҳозир шиддатли ўйинлар камайиб кетган. Олдимизда муҳим мусобақа турибди. Агар 2018 йилда олий лигада биронта ўзгариш билан футболчиларни ОК-2019га тайёрламасак, у ердаги натижамиз ҳам ёмон бўларди. Кеча янги регламентни кўриб қувонган томоним шунда бўлди-ки, ҳеч бўлмаса сўнгги 12та тур росмана футбол бўлар экан. Айниқса, аутсайдерлар билан ўйинда қўлга киритилган очколарни бекор қилиниши турнир жадвалини қиздириб юбориши аниқ. Супер лигада қолиш учун ҳам кураш қизғин кечади. Фақат легионерлар масаласига жиддий қарасак яхши бўларди. Ҳамма жамоадаги легионерлар ҳам бу мақомга мос эмас. Биз ўйнаган пайтдаги легионерларни қаранг, биргина жамоадошим Боян Миладинович. Агар ўша пайт жароҳати ҳалақит қилмаганида, бемалол Европанинг топ жамоасида тўп тепарди. Ёки рақибимиз "Бунёдкор"даги легионерларчи? Геворкяндек легионерлар келаяптими? Кўр-кўрона пул ишлатмасдан, ўша пулни ўринбосарларга ёки росмана селекционерлар орқали легионерга ишлатиш керак деб ўйлайман. Чунки, маҳаллий футболчининг ўсиши бевосита легионерга боғлиқ.

МТЖ МУРАББИЙИ ҲАҚИДА

Яқинда ЎФФ Президенти Умид Аҳмаджонов билан кўришдим. Анча суҳбатлашиб ўтирдик. Ўз ўрнида МТЖ масаласи ҳам четда қолмади. Терма жамоамиздаги фаолиятимдан қачон қониқаман? Қачонки, бирон натижага эришсам. Ҳозир бизга ким бош мураббий бўлиши жуда муҳим. Айтишларича, у ЖЧда ишлайдиган ва Осиё футболини яқиндан биладиган мураббий экан. Ҳақиқатдан ҳам шундай бўлса биздан кейинги авлод учун бу жуда яхши. Оддий мисол Липпи Хитойни қандай кучайтириб юборганига қаранг ёки Кейруш. Кейрушнинг дастури бутун Эронда қўлланилади. Бизга ҳам шундай мураббий бўлса ва ҳар бир жамоа терма жамоага яқин ўйин тактикаларидан фойдаланиб, ўша машғулотларни ўтказса шунда МТЖга тайёр ҳолатда келади.

ОСИЁ КУБОГИ-2019 ҲАҚИДА

Ҳозир қийин вазият. Кўплаб тажрибали футболчилар МТЖдаги фаолиятларини тугатдилар. Осиё Кубогига бор йўғи 1 йил қолди. Шунинг учун олий лиганинг 2018 йилдаги мавсуми биз учун жуда катта аҳамият касб этади. Ҳар бир клуб футболчиларининг жисмоний ҳолатлари оптимал ҳолатда бўлсагина, биз январь ойида Қатардаги натижамизни қайтаришимиз мумкин бўлади. Бунинг учун мураббийнинг қўли ҳам бўлиши керак. Терма жамоамизда 1992-96 йил авлод вакиллари йўқолиб қолган. Бу ёшларга бўлган имкониятни олий лигада кескин тушиб кетганидан бўлди. Биз тўп тепган пайтимизда ёшлар лигасида икки нафар 18 ёшли футболчини майдонга тушиши мажбурий бўларди. Ҳозир ҳам шуни амалга ошириш керак.

ФУТБОЛ МАКТАБИ ҲАҚИДА

"Odil Junior" бўйича олиб бораётган ишларимиз яхши кетаяпти. Яқинда Италиянинг "Карпи" жамоаси билан ҳамкорликни йўлга қўйдик. Ҳозир ишларимизни кенгайтириш йўлида иш олиб бораяпмиз. Қувонганим, энди барча клубларда академия бўлиши керак экан. Улар билан ҳам ҳамкорлик қилишни мақсад қилаяпман. Яқинда Жиззахдаги футбол интернати "Сўғдиёна" клубига ўтгани ҳақида эшитдим, янги майдонга сунъий чим ётқизишга ҳам улгуришибди. Албатта, бу каби ишлар керак. Энди Сербия, Хорватия ва Австрия каби давлат футбол клублари билан ҳамкорлик қилишни ўйлаб турибмиз. Ўзбекистондан тўғридан-тўғри Европанинг топ клубига кетиш қийин. Юқоридаги давлатлар эса трамплин вазифасини бажариб беради.

Келаётган 2018 йил барчангиз учун ғалабаларга бой бўлсин.