"Нефтчи"нинг грециялик мураббийи: "Соврин қўлга киритиш — бу таърифлаб бўлмайдиган туйғу"

— Илгари ҳам Ўзбекистонда фаолият юритгансиз. Бу сафар янги жамоага мослашиш жараёни ҳақида гапириб берсангиз...

— Биринчи дақиқаданоқ жамоа раҳбарияти ва бош мураббий менга лойиҳани тақдим этганида, жуда катта ҳаяжон хис қилдим. Футболга бўлган иштиёқим ва муҳаббатим мени дунёнинг кўплаб жойларига олиб борди. Аммо "Нефтчи" менга кўрсатган истиқбол сабаб аввал оилам билан, кейин эса жаноб Купер билан гаплашдим ва охир-оқибат унинг мураббийлар штабини тарк этишга қарор қилдим. Унинг розилиги ва яхши тилаклари билан "Нефтчи" таклифини қабул қилдим. Мослашув жараёнига келсак, бунга вақт ҳам бўлмади, чунки Анталиядаги биринчи иш куниданоқ жуда қаттиқ иш бошладик. Кўп соатлик машғулотлар, кўплаб ўртоқлик учрашувларини ўтказдик. Фарғонага қайтгач, расмий ўйинларга эътибор қаратишимиз керак эди. Бундан ташқари, футболчиларимизга бутунлай бошқача профессионал кундалик ҳаётни таклиф қилишни хоҳладик. Бу эса катта меҳнат ва сабр-тоқатни талаб қилади. Шу билан бирга, Ўзбекистоннинг менталитети ҳамда турмуш тарзини аллақачон билардим ва ростини айтсам, буни жуда соғингандим.

— Суперкубок ўйинига келсак, финал ҳуштагидан кейинги хис туйғуларингиз ҳақида... 

— Мен ханузгача бунга тўлиқ ишониб улгурмадим, гўё орзудек туюляпти. Аммо соврин қўлга киритиш — бу таърифлаб бўлмайдиган туйғу. Ҳаяжон, қувонч, ўзини оқлаганлик ҳисси, бу жуда ажойиб эди. "Нефтчи" билан яна кўплаб лаҳзаларни бошдан кечириш учун қаттиқ меҳнат қиламан. 

— Футболчилар майдонга тушишидан олдин уларга нима дедингиз?

— Кийиниш хонасидан чиқишдан олдин уларга тўлиқ диққатни жамлашларини сўраб: "Бир-бирингизга ишонинг, бир-бирингиз учун курашинг ва биз ғалаба қозонамиз", дедим 

— Стадиондаги муҳит ҳақида нима дея оласиз? Уни Европа ўйинларидаги муҳит билан солиштирса бўладими?

— Мен аллақачон мухлисларимиз билан ўзгача бир боғликликни хис қиляпман. Улар менинг жамоам "Арис" Салоники мухлисларини эслатади. Бизда бир хид ранглар, бир хил фанатизм, жамоага бўлган бир хил севги бор. Улар жамоани ҳамма жойга кузатиб боришади. Ҳатто тимсолимиз ҳам бир хил — йўлбарс! Бир кун келиб икки клуб ўртасида биродарлик бўлишини жуда хоҳлардим.