Наманган футболи туб ислоҳот остонасида. Хайрулла Ҳайитбоевичнинг янги лойиҳаси

Эътиборлиси шундаки, тақдирлаш маросими якунига етгач Наманган вилоятининг барча туман ҳоким ўринбосарлари, вилоят молия бошқармаси вакиллари, вилоят спорт бошқармаси бошлиғи, вилоят 2-лига иштирокчилари мураббийлари, вилояти БЎСМ директор ва футбол мураббийлари қатнашдилар. Бундай тадбир Ўзбекистонда илк маротаба Наманганда бўлиб ўтди. 

Таҳлилий-танқидий йиғилиш давомида Хайрулла Ҳайитбоевич сўнгги йилларда Наманган футболидаги оғриқли муаммо - болалар футболига кенг тўхталиб ўтди. Наманганда бўлиб ўтаётган мусобақада пойтахт клуби Фарғона вилояти жамоаси билан ўйнаганидан уялиши кераклиги, шунча наманганлик ёшлар имкон қидириб пойтахтга кетиб қолаётганини куюниб гапирди. 

"Қачон Наманган вилоятини яна кучлилар қаторига олиб чиқамиз, қачонки пойдеворни мустаҳкамласак. Бирлашадиган пайт келмадими? Нима учун вилоят 2-лига мусобақаси савияси тушиб кетди. Арзимаган харажатга эга мусобақага баъзи туманлар жамоа қўймади, нега? Бундай аҳволда қандай қилиб "Навбаҳор"ни ТОП жамоага айлантирамиз. Ҳар йили янгидан харажат қилинади, янгидан ўйинчилар олинади. Ўзимизнинг болалар қани? БЎСМ мураббийларининг малакаси тушиб кетган, директорлар уларнинг устида ишламай қўйди", - дея куйиниб гапирди ҳоким.

Ҳоким Наманган футболининг 10 йиллик дастурини оммага тақдим қилди. Дастур қуйидаги бўлимлар асосида кетма-кетликка эга.

НАМАНГАНДА 2019-2029 ЙИЛЛАРГА МЎЛЖАЛЛАНГАН ҲУДУД ФУТБОЛИНИ РИВОЖЛАНТИРИШ ДАСТУРИ

1. ВИЛОЯТ ФУТБОЛ ФЕДЕРАЦИЯСИНИ РИВОЖЛАНТИРИШ ЛОЙИҲАСИ

2. ШАҲАР ВА ВИЛОЯТ БИРИНЧИЛИГИ

3. НАМАНГАН МОДЕЛИНИ ЯРАТИШ

4. МУРАББИЙЛАР МАЛАКАСИНИ ОШИРИШ 

5. БЎСМ, ИБЎСМ, ИНТЕРНАТ-ЛИЦЕЙ ВА КОЛЛЕЖ 

6. 2-ЛИГА ва “НАВБАҲОР” ЎРИНБОСАРЛАРИ 

7. АСОСИЙ ТАРКИБ

Дастур асосида 2 ой давомида Наманган футболи мониторинг қилинади. Ҳар бир шаҳар, ҳар бир туман ва ҳар бир қишлоқдаги мактабларда энди селекция ишлари олиб борилади. Бу борада Наманган футболининг яқин ўтмишдаги юлдузи Шуҳрат Мирхолдиршоевга катта топшириқ берилди. 20 августга қадар барча наманганликлар келишган ҳолда якуний иш режасини тақдим этишлари керак бўлади. 

Ўз навбатида Ўзбекистон миллий терма жамоаси сардори Одил Аҳмедов ҳам вилоятда футболни ривожлантириш йўлида қўлидан келган барча ёрдамни аямаслигини таъкидлаб ўтди.

2019 - 2020 (куз - баҳор) мавсумида ўзини ҳар томонлама яхши кўрсатган 3 нафар БЎСМ маъмурига хорижга дам олиш учун чипта тақдим этилиши маълум бўлди. Рағбат орқали, БЎСМ фаолиятларини яна аввалги ҳолатига олиб чиқиш бош мақсад. Энди Республикадаги энг яхши мусобақаларга Наманган вилояти мезбонлик қилади ва бу ишларга Одил Аҳмедов ҳомийлик қилади. Ҳар йили энг яхши наманганлик болалар мураббийлари хорижда ташкил қилинадиган савияли мусобақаларга малака оширгани юборилади.