Миржалол Қосимов: "Бундай совуқда футбол ўйнашнинг яхши томони ҳам бор"

Эртага анчагина қизиқарли ўйин бўлиши кутилмоқда. Охирги марта 2013 йилда кубокда ғолиб бўлган эдик. Бундан ташқари бу йил медалларсиз қолдик. Эртанги ғалаба бир қатор футболчиларимизнинг фаолиятларидаги энг биринчи соврин бўлади. Кубокни қўлга киритсак бу бизга Осиё чемпионлар лигасига йўлланма беради. Очиқ, шиддатли ва қизиқарли ўйин бўлишига ишонаман. Сабаби иккала жамоа ҳам ғолиб бўлишга уринади. Рақиб жарима майдони ичидан бахтимизни излаймиз, - дейди Миржалол Қосимов.  

Ўйинга яхши тайёргарлик кўрдик. Эртага иккинчи марта кубок финалида ўйнайман. Ўтган сафарги финалда мағлуб бўлган эдим. "Локомотив" жамоаси анчагина кучли, аммо биз ғалаба учун курашамиз, - дейди Рустам Ашурматов.  

- Фақат 4 нафар футболчи ҳисобида кубок ва чемпионлик бор. Ёш футболчилар билан алоҳида ишландими?
- Албатта, балки бу ёшлар ҳали тушунишмаётгандир. Аммо йиллар ўтиб бу кубокни қадри қанчалик бўлишини тушуниб етишади.

- Олий лиганинг охирги турида "Локомотив" билан баҳсда сиз майдонни кўз ёшлар билан тарк этдингиз...
Рустам Ашурматов: - Бу ўйинни унутиб бўлдим. Фақат кейинги учрашув ҳақида ўйлаяпман.

Миржалол Қосимов: - Ўша ҳолат Рустамни янада кучли қилди.

- "Локомотив" билан чемпионат доирасидаги баҳсда рақибнинг кучсиз томонини кўра олдингизми?
- Албатта, ҳар бир ўйинда рақибни ўрганамиз ва кучсиз томонларини топишга уринамиз. Эртага ким камроқ хато қилса ҳамда вазиятлардан унумли фойдаланса ғолиб бўлади. Худди соат механизми каби ишлаш даркор.

- Об-ҳаво футбол ўйнаш учун қулайми?
- Яхши! Чунки совуқда югрурмаса шамоллаб қолади, шу боис совуқ бўгани яхши (кулади).

- Финалдан олдин жароҳат олганлар борми?
- Ҳали ўйингача 24 соат вақт бор. Худога шукурки ҳозиргача жиддий жароҳат олганлар йўқ.

 Нарзулла Сайдуллаев