"Ливерпуль" "Милан" ҳужум чизиғи етакчисига қизиқмоқда

Журналист Николо Скира маълумотига кўра, "Ливерпуль" "Милан"нинг 27 ёшли ҳужумчиси билан боғлиқ вазиятни диққат билан кузатмоқда. Амалдаги шартнома 2027 йилнинг ёзигача мўлжалланган бўлса-да, Италия клуби уни бир томонлама тарзда яна бир мавсумга – 2028 йилгача узайтириш ҳуқуқига эга.

Футболчининг ўзи "россонери" сафида ўзини қулай ҳис қилмоқда, бироқ у яхшироқ шартлар асосида янги битим таклифи олишни кутган. Ҳозирча узайтириш бўйича расмий музокаралар бошланмагани эҳтимолий даъвогарлар қизиқишини оширмоқда.

Пулишич А Серия ушбу мавсумида барқарор ўйин намойиш қилмоқда: у чемпионатда 16 ўйинда 8 та гол урди ва 2 та голга ассистентлик қилди. Америкалик ўйинчи Италия Кубогида ҳам самарали ҳаракат қилди — 3 ўйинда 2 бор гол урди.

Пулишич 2023 йилнинг ёзида "Милан"га ўтган ва қисқа вақт ичида жамоа ҳужум чизиғида муҳим фигурага айланган. Энди эса унинг келажаги яқин трансфер ойнасининг асосий мавзуларидан бирига айланиши мумкин.