Кейн "Бавария"дан кетишни хоҳламаяпти. Унга Ширернинг рекордини янгилаш унчалик ҳам қизиқ эмас

"Бавария" ҳужумчиси Ҳарри Кейн клубни тарк этишни режалаштирмаяпти. Аввалроқ, футболчининг шартномасида 65 миллион евро миқдоридаги тўлов банди мавжудлиги ва у ёзги трансфер ойнасида кучга кириши мумкинлиги маълум қилинган эди. Бунинг учун инглиз футболчиси ушбу бандни 31 январгача фаоллаштириши керак эди.

Bild хабар беришича, Кейн буни қилмасликка қарор қилган. Бундан ташқари, у 2026-йилги Жаҳон чемпионатидан сўнг Мюнхен клуби билан янги шартнома имзолаш масаласини муҳокама қилишга тайёр. Ҳозирги шартнома 2027 йилгача мўлжалланган, томонлар уни яна бир мавсумга узайтириш имкониятига очиқ.

Taъкидланишича, Ҳарри учун Алан Ширернинг Англия Премьер-лигасидаги голлар сони бўйича рекордини эгаллашдан кўра, "Бавария" билан соврин ютиш муҳимроқ. "Нюкасл"нинг собиқ ҳужумчиси Ширер Англия чемпионатида 260 та, Кейн эса 213 та гол урган.

"Барселона"нинг қизиқишига келсак, Каталония клубида ҳужумчи ҳақида ижобий фикрлар билдирилган, аммо унинг трансфери жиддий муҳокама қилинмаган.