Камолиддин Мурзоев: "Лауреат бўлиш мен учун ёқимли сюрприз бўлди"

- Умуман энг яхши футболчи бўлишингизни кутганмидингиз?
-  Мен учун бу кутилмаган сюрприз бўлди.

- Футболчи учун шу каби эътирофлар қанчалик ёқимли? Бу сизга қўшимча куч ёки мотивация берадими?
- Бу футболчи учун катта ютуқ албатта. Қилаётган меҳнатларнинг самараси деб биламан. Лекин шу билан биргаликда тўхтаб қолмаслик керак. Камида шу мавқеини сақлаб қолиш лозим. Бу каби эътирофлар футболчи учун янада яхшироқ ўйнашига катта мотивация беради.

- "Динамо"да ўйинингиз очилиб кетишини асосий омили нимада деб ўйлайсиз?
- Мураббий ишончи, жамоадошларим билан илиқ муносабат. Бу менга майдонда кўпроқ эркинлик бермоқда. Шунингдек, мен яна ўз жойимда, номинал ҳужумчи сифатида ўйнамоқдаман. Шу боисдан ҳам гол уришим, жамоага кўпроқ фойда келтиришим яхши томонга ўзгарди деб ўйлайман. Энг асосийси омиллардан бири эса бу омад. Футболчи учун омад жуда керакли ва муҳим нарса.

- "Динамо" Олий лигада жон сақлаб қоладими?
- Бунинг учун қўлимиздан келадиган барча ишни амалга оширамиз.

- Тасаввур қилайлик, "Динамо" мабодо Олий лигадан тушиб кетди. Шунда жамоада кейинги мавсум ҳам қолган бўлармидингиз?
- Бу ҳақида ҳаёлимга ҳам келтирмадим. Яхшиси олий лигада қолайлик, шуниси ҳамма учун яхши бўларди. Мен ҳали ўсишим керак, шу жиҳатдан олиб қараганда, биринчи лига ҳақида ўйлаш ноўрин.

- Олий лигадаги энг кучли 5 нафар футболчи номини айтинг...
- Жасур Ҳасанов (катта), Лутфулла Тўраев, Артур Геворкян, Игорь Сергеев ва Шуҳрат Муҳаммадиев.

- Сиз учун қайси дарвозабонга гол уриш қийин кечди?
- "Нефтчи" посбони Черемесин бу мавсумда мен учун чинакамига бош оғриқ бўлди.

- Ойнинг энг яхши футболчиси бўлганингиз билан сизни биринчи бўлиб ким табриклади?
- "Насаф"да бирга ишлаган дўстим Азиз Нурий мени биринчи бўлиб табриклади.

- Бу ютуқни кимга бағишлайсиз?
- Оила аъзоларимга ва айнан сентябрь ойида туғилган ўғлим Исломга бағишлайман.

Шаҳбоз Беғамов суҳбатлашди.