Ислом Исмоилов: "Гол ўтказмаслик сериясини узоқ давом эттиришни мақсад қилгандик"

- Ўйин ҳақида фикрингиз...

- Сўзим аввалида барчани муборак Рамазон Ҳайити ҳамда келаётган Наврўз байрами билан табриклайман. Ўйинга келадиган бўлсак, баҳс юқори шиддатда кечди. Одатда жамоа бирон бир совринни қўлга киритганидан кейин кейинги баҳс жуда оғир кечади. Жисмоний ҳолат бўйича тез тикланиш мумкин, лекин эмоция ва руҳий ҳолатни тиклаш оғир бўлади. Ҳалиям Суперкубокни ютганимиздаги эмоциялар таъсирида эканлигимиз билинди. Бундан ташқари "Локомотив" жамоасини ҳам эътироф этиш керак, бекорга юқори ўринларда юрмаяпти. Улар ҳам ўйинни яхши ўтказди. Стадионга келиб бизни қўллаб турган барча мухлисларга раҳмат айтиб қоламан.

- Бу мавсумда ҳозирча 12 та гол уриб фақат битта қўйиб юбордик. Кам гол ўтказиш тактика билан боғлиқми ёки дарвозабонларимиз зўр ишлаяптими?

- Албатта, иккаласи ҳам бир-бирига боғлиқ. Иккала ҳолатни ҳам эътироф этиш керак. Бугун пенальтидан гол ўтказдик ва бу бизга оғир таъсир қилди. Гол ўтказмаслик сериясини узоқ давом эттиришни мақсад қилгандик, лекин 4-турга келиб тугади. Ўйин услубимиз асосан рақиб ҳимояси олдида тузишга қаратилган. Кўпроқ ҳужум қилишни хоҳлаймиз. Дарвозабонлардан ташқари ҳимоя чизиғимиз ҳам аъло ўйин кўрсатяпти, буниям эътироф этиш керак. Айниқса жамоамиз сардори барчага ўрнак бўлиб келмоқда. Жамоамиз ҳужум ва ҳимояда зичлик ҳосил қила оляпти. Шу боис кўп гол уриб, кам ўтказяпмиз.

- Бугунги ўйин учун танланган бошланғич таркиб, яъни ротация ўзини қанчалик оқлади?

- Ротация юз фоиз ўзини оқлади деб айта оламан. Биз голгача яхши ҳаракат қилаётгандик ва гол ургач бироз бўшашдик. Рақиб ҳам майдонда футбол ўйнади. Биринчи бўлимдаги мақсадимиз кўпроқ босим уюштириб рақибнинг имкониятларини пасайтириш эди. Иккинчи бўлимнинг 60-дақиқасидан кейин устунликни қўлга олишимиз учун биринчи таймда ҳаракат қилган футболчилар ёрдами катта бўлди.