Габонлик суперқаҳрамон. Обамейянг голни яна ниқобда нишонлади

Ҳаммаси "Сент-Этьен"да бошланган. Ўшанда ёш форвард баҳс бойлаб ниқоб кийган: Жамоадошларидан кимдир унга бундай қила олмайсан деганди.

"Боруссия"да эса бу анъанага айланди. Обамейянг футболчиларни рок-юлдузларга тенглаштириб, унинг вазифаси одамларни хурсанд қилиш эканлигини айтган. Ўша пайтларда у Ўргимчак-одам ниқобини кияр эди.

Кейин бу одат унинг жамоадошларига ҳам ўтди. Бэтмен ва Робин - ёки, аниқроғи Обамейянг ва Ройс - голни нишонлашмоқда.

Аммо кейин футболчи чегарадан чиқди. Навбатдаги ниқоб бирор қаҳрамонга тақлид эмасди. Бу реклама бўлди. Обамейянгнинг Nike билан шартномаси бор ва ниқоб унинг янги бутсалари ишлаб чиқарилган материалдан тайёрланганди. Клуб ушбу нишонлашга рози бўлмаганди - чунки "Боруссия"нинг ҳомийи Puma эди.

100 минг евро жарима тўлашга тўғри келди.

Шундай кейин Пьер-Эмерик узоқ вақт голларни ниқобсиз нишонлади. Аммо 2 йил ўтиб ушбу одат яна пайдо бўлди.

Габонлик "Ренн"га қарши Европа лигаси 1/8 финал жавоб ўйинининг 72-дақиқасида ўз жамоасининг учинчи голини урди ва ҳаммага ўзининг янги ниқобини намойиш этди. Бу сафар ҳаммаси рекламасиз бўлди. Ниқоб - комикслар қаҳрамони Қора пантераники. Бундай нишонлаш учун уни жазолашмаса керак.