Эрон билан ўйинга уч кун қолди. "Озоди"да қандай ўйнаш керак?

Эртага терма жамоамиз чартер рейси орқали Теҳронга учиб кетади.

Март ойида "Локомотив" билан Эронга борганимда машҳур "Озоди" стадионида тўп тепиш рақиб учун қанчалик қийин эканини ўз кўзим билан кўргандим. Шу боис қуйида ўз кўрган ва билганларимни сайтимиз ўқувчиларига етказишни лозим топдим.

Терма жамоамиз салкам беш йиллик танаффусдан сўнг иккинчи бор Теҳронга сафар қилади. У ерга боргандан кейин биринчи навбатда ташкилотчиликка беэътибор бўлиш лозим. Чунки эронликлар ташкилий ишларни доим ҳам сиз ўйлагандек вақтида амалга оширишмайди. Масалан, меҳмонхонага бордингиз дейлик, сизга вай-файнинг яширин калит сўзини вақтида беришмаса бунга оддий ҳолдек қаранг. Тўғри, ҳамма нарсани талаб қилиш керак, лекин йўқ бўлса ортиқча асабийлашиб бошингизни оғритиб ўтирманг. Бу фақат ўзимизга минус келтиради.

Аслида-ку, муаммо аэропортнинг ўзидаёқ бошланиши мумкин. Сизни катта тантана билан кутиб олишмаса бундан хафа бўлманг. Автобус тирбандликда узоқ вақт туриб қолса, кўриб кўрмасликка олинг. Умуман олганда, у ерга боргандан сўнг фақат футболни ўйлаш керак. Терма жамоамиз агар эртага вақтли учадиган бўлса, кечки пайт у ерда машғулот ўтказиши мумкин. Майдон масаласи қандай ҳал қилинади, билмадик.

Лекин ўйиндан бир кун олдинги митингда биз нима хоҳлаётганимизни учрашув комиссарига очиқ ва аниқ қилиб тушунтириш шарт. Масалан, бизга қўшимча дарвоза керакми, буни ҳам айтишни унутмайлик. Чунки эронликлар ўйиндан бир кун олдинги расмий машғулот пайтида сизлар дарвоза сўрамагансизлар, шунинг учун бошқа йўқ деб туриб олишлари ҳеч гап эмас.

Митингга биздан ким боради билмадиг-у, лекин терма жамоамиз яхши машғулот ўтказиши учун нима керак бўлса уялмасдан бемалол сўрайверинг. Керак бўлса, комиссар ён дафтарчасига биз учун керакли нарсаларни ёзиб қўйсин ва машғулот пайтида нимадир йўқ бўлса, талаб қилишга ҳақли бўлайлик.

У ерга боргандан сўнг регламентда шу нарса ёзилган, бизга қилиб беришади деб қараб ўтирманг, талаб қилаверинг. Чунки Эронда бор нарса ҳам ўйинга оз қолганда йўқ бўлиб қолиши мумкин. Катта эҳтимол билан ўйинолди матбуот анжумани ҳамда митинг Эрон футбол федерацияси биносида ўтказилади ва меҳмонхонадан йўлга чиқаётганда вақтлироқ ҳаракат қилинг. Чунки машина йўл тирбандлигида кўпроқ қолиб кетиши мумкин.

Ана энди ўйин кунига келамиз. Ҳозирданоқ тасаввур қилиш қийин эмас ўйин биз учун жуда мураккаб кечади. Чукни "Озоди" стадионида тўп суриш осон эмас. Масалан, "Локомотив" 13 март куни шу стадионда "Истиқлол" билан ўйнаганида осон бўлмаганди. "Истиқлол" - Эрон терма жамоасининг ўзаги ҳамда ўйин услуби ўхшашлигини инобатга олсак, Эрон ҳам биринчи дақиқалардан ҳужумга ўтади.

Улар ғалаба қозонса, жаҳон чемпионатига чиқишганини стадиондаёқ байрам қилишади, шу боис эронликлар учун бу ўйин катта аҳамиятга эга. Улар ўйин бошланиши билан бизни жарима майдончамизга "қамаб қўйишга" ҳаракат қилишади. Эрон билан ўйнаганда биринчи навбатда ваҳимага тушмаслик шарт. Негаки муҳташам "Озоди" стадионида уларни минглаб мухлислар қўллаб туради.

"Озоди" стадиони жуда катта, лекин кўркам эмас. Эски стадионга ўхшаб кетади. Масалан, "Бунёдкор"га ўхшаб чиройли эмас. Аммо стадион катталигидан 40-50 минг одам у ерда камдек кўринади. "Истиқлол" - "Локо" ўйинига 42 минг мухлис келгани билан кўпдек кўринмаганди. Чунки бу ўйингоҳ ўз бағрига 100 минг томошабинни сиғдира олади.

12 июнь куни стадион тўлиши кутилмоқда. Агар юз минг одам ўйинга келадиган бўлса, стадион худди қайнаб турган қозонга ўхшаб қолади. Футболчиларимиздан биринчи навбатда ишқибозлар таъсирига тушиб қолмасликни сўраган бўлардик. Чунки у ерда мухлислик даражаси жуда кучли. Эронлик мухлислар ўз жамоаларини ажойиб қўллашади, тинмай қўшиқ куйлашади, чапак чалишади. Одамлар ҳайқириғидан футболчилар бир-бирларининг гапини эшитмаслиги аниқ.

Бундан ташқари, у ерда маҳаллий мухлислар рақибга тазйиқ ўтказишни хуш кўришади. Ҳақоратли гаплар ҳам қулоққа чалиниб қолиши мумкин, лекин буларнинг ҳеч бирига эътибор бермаслик керак. Энг муҳими, футболчиларимиз стадион аурасига тушиб қолмаса бўлгани. Бевосита Эронга қарши қандай ўйнаш кераклиги ҳақида биз кўп ҳам гапира олмаймиз, бу ҳақда яхшиси терма жамоа мураббийлари фикр билдиргани маъқул.

Хайрулла Холиқов