Эдгар Гесс "Шўртан"дан нима учун кетганини сайтимизга маълум қилди

Бундан эса кўпчилик ҳайрон қолди. Одамларда мураббий нима учун атиги бир ҳафта ишлади, нима сабабдан клубни тарк этди каби саволларга юзага кела бошлади. Шуни айтишимиз мумкин, биз ҳозирча шу ва бошқа саволларга жавоб олиш мақсадида "Шўртан" футбол клуби раҳбари билан боғлана олганимиз йўқ. Катта эҳтимол тез орада улардан ҳам фикр олишни мўлжаллаб турибмиз. 

Мураббий Эдгар Гесс сайтимизга нима учун клубдан кетганини ошқор қилишга рози бўлди. Шу боис ҳозирча фақат Гесснинг фикрларини бериш билан чекланамиз. Агар тез орада "Шўртан"дан бирор вакилнинг гапларини эшитсак, ўйлаймизки, иккала томоннинг фикрини ўқувчилар ҳукмига ҳавола қилган бўламиз. 

- Эдгар Яковлевич, "Шўртан"дан бу сафар жуда тез кетдингиз. Бунинг сабаби нимада? 

- Клуб раҳбарияти билан масаланинг молиявий томонлари борасида келиша олмадик. Шу боис жамоадан кетишга қарор қилдим.

- Гап катта пул ҳақида боряптими? 

- Катта пул деганда нимани тушуниш мумкин? Агар сиз 100 миллион сўм ҳақида гапирадиган бўлсангиз, бу чиндан ҳам катта пул. Лекин мен ҳозирги шароитдан келиб чиққан ҳолда кам пул сўрадим. Аммо раҳбарият мен сўраган маошни қилиб бера олмаслигини айтди, натижада уларга омад тилаб жамоа билан хайрлашдим. 

- Аниқ бир суммани айта оласизми? 

- Бунинг ҳожати йўқ деб ўйлайман. Ўзбек футболида ишлаётган кишилар олий лига мураббийлари тахминан қанча маош олишаётганини жуда яхши билишади. Мен ҳам вазиятдан келиб чиқиб иш тутдим. Шуни айтишим мумкин, мен сўраган маош бир пайтлар Игорь Криушенкога тўланган пуллар олдида ҳолва. Мен Криушенкога тўланган суммадан 45 марта кам пул сўрадим десам бўлади. 

- Буни қандай тушуниш мумкин? 

- Жуда оддий, яъни мен сўраган маош айтайлик, "Обод", "Сўғдиёна" мураббийларига тўланаётган пулдан сал кўпроқ бўлиши мумкин, аммо "Пахтакор", "Бунёдкор", "Олмалиқ" мураббийлари олаётган пул олдида ҳеч нарса эмас. 

- "Шўртан"га яна қайтишдан мақсадингиз нима эди? 

- Жамоа иккинчи даврада қандай иштирок этмасин, ФИФА талабига кўра кейинги йил биринчи лигада ўйнаши мумкин. Чунки ФИФА "Шўртан" биринчи лигага тушириб юборилсин деган талабни қўйган. Аммо мен шундай шароитда ҳам ишлашга рози эдим. Биринчи навбатда Ғузорда яхши бир футбол мактаби барпо этишга ёрдам бермоқчийдим. Кейинги масала таркибни ёшартириш бўлиб, сафимизга 1995-96-97 йилларда туғилган футболчиларни таклиф этиш режамда бор эди. Лекин клуб раҳбарияти билан келиша олмагач, кетишга мажбур бўлдим. 

- Ҳозирги шароитда пул сиз учун муҳимми? 

- Пул мен учун биринчи ўринда дея олмайман. Аммо олий лигада ҳеч бир мураббий текинга ишламаслигини ҳам жуда яхши биламан. Мен ўз ишим ва кўрсатган натижаларим туфайли ўзимга маъқул келган суммани сўрашга ҳақлиман ва бунинг ажабланарли жойи йўқ. Одамлар мен ҳақимда ҳар хил гапиришяпти. Гесс ўзи нимани қойиллатган дейишмоқда. Мақтаниш эмас-у, 2008 йил "Бухоро"да ишлаганимда жамоа етти ой ойликсиз юрган, лекин биз олий лигада қолгандик. Кейинги йил эса мен кетдим, жамоада пул пайдо бўлди, аммо "Бухоро" олий лигадан тушиб кетди. 

- Бир нарсани ҳайрон қолдиряпти. Сиз "Шўртан"га келиб шартнома туздингиз, ҳатто бир ҳафтача ишладингиз ҳам. Шартнома тузаётганда ойлик маош суммаси кўрсатилмаганмиди? 

- Агар шартнома тузганимда сумма кўрсатилган бўларди. Мен келишим билан шартнома тузганим йўқ, балки раҳбариятнинг гапига кўра, яъни улар билан оғзаки келишиб олгач, ишлаб турдим. Аммо кейинроқ раҳбарият менга бу пулни тўлай олмаслигини айтди ва биз профессионалларча хайрлашдик. 

- Бундан афсусдамисиз? 

- Йўқ, мен вазиятни яхши тушунаман. Раҳбар клубда пул йўқ дедими, демак тортишиш керак эмас. Ҳамманинг фикрини ҳурмат қилган ҳолда жамоадан кетдим. 

- Сиз билан бу йил иккита қизиқ воқеа содир бўлди: биринчиси, йил бошида "Динамо"га бориб ишламай кетдингиз, энди бўлса "Шўртан" билан ҳам шу ҳол юз берди. Булар тасодифми? 

- "Динамо"га бориб ишлай олмаганимга келсак, ўша пайт мазам қочиб қолди. Шундай бўлдики, бир ой ётоқдан тура олмадим. Албатта, инсон учун соғлиқ биринчи ўринда туради. Бунгача қаерда ишламай, ҳали бирор марта машғулотни ўтказиб юборган эмасман, аммо энди вақт ўтяпти ва мен ҳам соғлиғим ҳақида қайғуришга мажбурман. "Шўртан"даги воқеадан эса ўзингиз хабардорсиз.

- "Шўртан"дан кетишингизни эшитиб футболчилар қандай муносабатда бўлишди? 

- Ҳамма билан хайрлашиш имкони бўлмади. Лекин мени хурсанд қилган жиҳат, олдин ишлаган пайтимда кўз ўнгимда тўп тепиб юрган ёшлар улғайиб катта бўлишибди. Олдин ҳеч ким керак бўлмай қолган Вадим Афонинни мен "Шўртан"га олиб келиб ўйнатгандим. Ҳозир у Россия чемпионатида ўйнаяпти. Бундан жуда хурсандман. Эндиликда "Шўртан" тарбияланувчилари "Машъал" ва "Насаф"да ҳам тўп тепишяпти. Буни ҳам яхши натижа деса бўлади. Умуман олганда, "Шўртан"даги фаолиятимдан мамнунман ва уларга иккинчи даврада омад тилайман. 

Х.Холиқов суҳбатлашди.