"Эчеверри тинмай машқ қилди, меҳнат ўз натижасини кўрсатди" — Гвардиола

"Эчеверри ўтган мавсумда келганидан бери, уч-тўрт ой давомида машғулотлар охирида якка ўзи дарвозабон ва девор билан жарима зарбаларини машқ қиларди. Бошқалар бундай қилмасди.

У тинмай машқ қилди, меҳнат ўз натижасини кўрсатди, унда жасорат ва маҳорат бор эди. Машқ қилиш гольф ёки баскетболга ўхшайди: қанча кўп ҳаракат қилсангиз, шунча кўп имкониятга эга бўласиз. У ажойиб гол урди ва кичик бўшлиқларда ғоят моҳир ўйинчи эканлигини исботлади.

Афсуски, тўпиғидаги муаммо туфайли танаффусдан кейин ўйинни давом эттира олмади, аммо бу мусобақадаги илк дақиқаларидаёқ ажойиб гол ургани жуда яхши бўлди. Жарима зарбаси ҳақиқатан ҳам жуда зўр чиқди.

Энг муҳими, биз кейинги босқичга йўл олдик.

Биз олдинга интиляпмиз ва охир-оқибат кучли жамоаларга дуч келишимиз муқаррар. Бразилия жамоалари ва Европанинг энг яхши клублари иштирокидаги ўйинларга гувоҳ бўлаётгандирсиз, аммо бу бизни унча ташвишлантирмайди.

"Ювентус" билан ўйинимизга тўрт кун қолди, ундан кейин эса навбатдаги рақибимиз билан учрашувимиз бўлади. Қўшма Штатларда яна бир ҳафта қолаётганимиздан хурсандман", – деди Гвардиола.