Дэвид Бекхэм Рубен Аморимнинг МЮдаги фаолияти ҳақида: "Уни қўллаб-қувватлаш керак, кейин натижани кўрасиз"

"Рубен мураббий сифатида ўз фалсафасини жамоага олиб кириши учун қўллаб-қувватлашга муҳтож. У аллақачон бунга ҳаракат қилмоқда, бироқ менимча, у ўз жамоасини ва ўйинчиларни жамоага жалб қилганидан сўнг натижаларни кўрасиз", – деди Бекхэм.

"Қизил иблислар" собиқ аъзоси, шунингдек, раҳбарият футболчилар трансфери борасидаги сиёсатини ўзгартириши кераклигини айтди ва клубни Бруну Фернандешни сотмасликка чақирди.

"Мен Фернандешни сотишга ҳожат йўқ деб ўйлайман. У ажойиб эди. Биз вақти-вақти билан "Юнайтед"нинг баъзи ўйинчиларини танқид қилганмиз, аммо кимдир олдинга бориши керак бўлганида, у буни амалга оширди.

“Юнайтед”нинг ёш футболчилари клубни тарк этиши ҳам менга ёқмайди. Биз футболчиларни фақат молиявий сабабларга кўра сотмаслигимиз керак", – дея қўшимча қилди у.

Бруну Фернандешнинг ютуқлари нафақат Бекхэм томонидан қайд этилди – португалиялик футболчи 2024/25 йилги мавсум якунига кўра жамоанинг энг яхши футболчиси деб топилди.