Аёллар футболи: Терма жамоа Жаҳон чемпионатига тайёр ҳам, лойиқ ҳам эмас

Гуруҳдан бир амаллаб чиққан қизлар кейинги иккита ўйинда мағлубиятга учраб, 2027 йилги Жаҳон чемпионати йўлланмасидан қуруқ қолди. Тўғри, биз кейинроқ халқаро Конфедерациялар ўтиш турнирида иштирок этамиз, лекин бундан не фойда. Шунчаки йил охиригача турли сафарлар, йиғинлар ва ўртоқлик ўйинлари ўтказганимиз қолади. Халқаро ўтиш турнирида ниманидир қойил қилишимизга тўғриси ишонч йўқ. Ишонч фақат Филиппин билан ўйинда бор эди, лекин у ҳам пучга чиқди.

Ўзбекистон аёллар терма жамоаси Австралиядаги Осиё Кубогида бешта ўйин ўтказди. Натижаларни келтириб ўтамиз:

Шимолий Корея - Ўзбекистон 3:0

Хитой - Ўзбекистон 3:0

Ўзбекистон - Бангладеш 4:0

Жанубий Корея - Ўзбекистон 6:0

Филиппин - Ўзбекистон 2:0

Умумий бешта ўйиндан 4тасида мағлубият ва бир ғалаба. Тўплар нисбати 4-14. Биз фақат футбол ўйнашни билмайдиган Бангладешни ютдик холос. Чунки Бангладеш аёллар терма жамоаси гуруҳдаги ҳамма ўйинларни ютқазди, бирорта ҳам гол ура олмасдан - уч ўйинда 11та гол ўтказиб мусобақани тарк этдик. Футбол ўйнашни биладиган давлатлар билан тенма-тенг ўйнай олмадик. Очиғи, биз Осиё чемпионатида нимадир каромат кўрсатиб, ЖЧга боришга лойиқ эмасдик. Умуман биз Жаҳон чемпионатига ҳали тайёр эмасмиз.

Агар Европа аёллар жамоалари иштирокидаги ўйинларни кўрмаган бўлсангиз, кўришни маслаҳат бераман. Франция, Англия, Испания - булар жуда кучли ўйин намойиш этади. Ҳатто баъзи учрашувларга 20-30 минглаб мухлис келади. Ўйин темпи ниҳоятда баланд, эркакларникидек тез ва курашларга бой. Очиғи, биз уларнинг даражасига яқин ҳам кела олмаймиз. Шунинг учун "кўрпангга қараб оёқ узат" мақоли бизга жуда мос келади ва Жаҳон чемпионатига борилган тақдирда шафқатсиз ҳисоблар бўлишини тасаввур қила оламиз. Кореядан 6та гол ўтказган жамоа Франциядан камида икки баробар кўп ўтказади. Чунки бизнинг ҳозирги даражамиз шу.

Эътибьор беринг-а, ФИФА ЖЧ учун Осиёга 6та ўрин берган. Бу жуда яхши кўрсаткич. Энг қизиғи, йўлланма учун кураш Осиё чемпионатидан кейин ҳам давом этади. Шу йилнинг ноябрь-декабрь ойларида халқаро Конфедерациялар ўтиш турнирининг биринчи босқичи, келаси йил февралда иккинчи босқич ўйинлари бўлиб ўтади. Осиёдан Ўзбекистон ва Хитой Тапейи шу учрашувларда иштирок этади. Бу дегани кетди яна йил охиригача ўқув-йиғинлар, охири кўринмайдиган сафарлар...

Ушбу Осиё чемпионати терма жамоа бош мураббийига ҳаққоний баҳони бериб бўлди. Литвалик Котрина Кулбите амалда ишончни оқлай олмади. Майли, футболда доим ютиш имконсиз, бўлиб ҳам энди-энди тетапоя қилаётган Ўзбекистонда аёллар футболини бирданига кучайтириб бўлмайди. Буни ҳам тушунамиз, аммо нуқул "сухой" ютқазишни қандай қабул қилиш мумкин. Шимолий Корея ёпиқ давлат, лекин негадир уларнинг қизлари яхши футбол ўйнайди. Улар четма-чет йиғин ўтказмаса ҳам керак. Биз гол ўтказдикми, тамом ютқазамиз. Яна битта гол билан кифояланиб қолмаймиз, камида иккита билан бошлаб олтита билан тугатамиз.

Аёлларга ҳурматимиз чексиз, лекин Ўзбекистонда аёллар терма жамоасини эркак мураббийи бошқариши керак деган фикрдаман. Кўп давлатларда аёллар терма жамоасини эркаклар бошқаради ва натижага эришади. Масалан, Осиё чемпионатини ойлик. Мусобақа 12та жамоа иштирокида бошланиб, шундан 8таси гуруҳдан чиқди ва чорак финалга йўл олди. 

Чорак финалда ўйнаган жамоалар мураббийлари:

Жанубий Корея - Шин Санг Ву (эркак, фуқаролиги Жанубий Корея)

Япония - Нилс Ниельсен (эркак, фуқаролиги Дания)

Филиппин - Марк Торкасо (эркак, фуқаролиги Австралия)

Хитой - Анте Миличич (эркак, фуқаролиги Австралия)

Хитой Тайпейи - Прасобчоке Чокемор (эркак, фуқаролиги Таиланд)

Австралия - Жо Монтемурро (эркак, фуқаролиги Австралия)

Шимолий Корея - Ри Сонг Хо (эркак, фуқаролиги КХДР)

Кўряпсизми, биздан бошқа ҳамма жамоани эркак мураббийлар бошқариб келмоқда. Чунки эркакларда ўргатиш ва билим беришни аёлларга нисбатан устун деб биламан. Оддий мисол, мактабларда энг зўр ўқитувчилар ким? Эркаклар. Машина ҳайдашни ким яхши ўргатади? Эркак киши. Майдонда ким яхши ҳакамлик қилади? Эркаклар. Тўп тепишни ким яхши ўргатади? Эркак киши. 

Таклифим - Котрина Кулбитега раҳмат айтиб чиқиш эшикларини кўрсатиш лозим. Унинг даражасини кўрдик. Котрина ҳали ёш ва терма жамоа даражасида кучли эмас деб ўйлайман. Эҳтимол у малака ошириш учун биронта аёллар клубини бошқаргани маъқулдир. Лекин мамлакат аёллар терма жамоасига ҳали анча саёзлик қилар экан. Аёллар терма жамоамизга эркак кишини, бўлиб ҳам тажрибали ва ёши 45дан ошган эркак мураббийни тайинлаган маъқул деб биламан. Ўзимизда ҳам бор шундай мураббийлар ва улар аёллар жамоаларида ёмон ишламаяпти. Қизлар майли, тўп тепсин, ёрдамчи мураббий бўлсин, шифокорлик қилсин, аммо бош мураббий ва дарвозабонлар мураббийи эркак кишининг иши.

Х.Холиқов