Алишер Узоқов: "Бу каби мусобақалар доимий ўтказилиб турилиши тарафдориман"

- Ўйинларимиз ҳақида фикрларим унча яхши эмас. Мусобақадаги ўйинларимизни ютқаздик (кулади). Биринчи ўйинда йирик ҳисобда мағлуб бўлдик. Ўйинлар вақти бизларга ноқулайлик туғдирмоқда. Чунки бу пайтда ижод аҳли асосан уйда дам олаётган бўлади. Оёқларимиз ҳали ҳам уйқуда (кулади). Ушбу мусобақа орқали бошқа турли хил касб эгалари билан бирга ўйнамоқдамиз. Дўстларимизни кўрмоқдамиз. Янги танишлар орттирмоқдамиз, эски танишларни дийдорини кўряпмиз. Спорт одамларни бирлаштиради дейилади, бу айни ҳақиқатлиги яна бир маротаба исботини топмоқда. Спорт яхшиликка хизмат қилмоқда.
Ўтган сафарги турнирда Равшан Эрматов бошчилигидаги "Ҳакамлар" жамоаси илиқ таассурот қолдирганди. Бу галги мусобақада Олий суд судяларини алоҳида эътироф этган бўлардим. Шунингдек, мусобақада янги келиб қўшилган "Осиё" жамоаси жуда кучли экан. Бундан хабарим йўқ эди. Биз ва журналистлар жамоаси аутсайдерлар қаторида эканмиз. Футболда жисмоний тайёргарлик жуда муҳим аҳамиятга эга. Аввалги спорт формамни анча йўқотиб қўйганим панд бермоқда. Одам футбол ўйнашни яхши билгани билан, унинг жисмоний тайёргарлиги жойига бўлмаса, мия буюрадиган вазифани бажариш қийин бўларкан. Бу каби мусобақаларни ўтказиб турилиши жуда қувонари ҳолат. Гап натижада эмас, турли касб вакиллари ўзаро бирлашишларига ҳам спорт, хусусан футбол яхшигина хизмат қилмоқда. Умид қиламанки, ушбу мусобақа давомий ўтказилиб турилади. Агарда шу каби турнирлар ўтказилаверилса, ўйлайманки биз ҳам тезда ўз спорт формамизни тиклаб оламиз. Шундан сўнг аввалгидек голлар уришни бошлаб юбораман ва бу мусобақа спорт формамни тиклашимга ўз ҳиссасини қўшган бўлади (кулади). Ўзбекистон футзал терма жамоамизга эса Осиё чемпионатига омад ёр бўлиши тилаб қоламан.