Александр Хомяков: "Андижон мен учун қадрдон шаҳар, лекин бу ерга ютиш учун келгандик"

- Ўйин ҳақида фикрингиз?

- Ўйин ўзига яраша босимли кечди. Очколар жуда ҳам зарур пайтда таваккал қилишга ҳаракат қиляпмиз. Бошқалар ҳам шундай йўл тутяпти. Чунки декабрда бўладиган плей-офф ўйинларида ҳеч кимнинг майдонга тушгиси йўқ. Биз осон бўлмаслигини, Кубок финалидан кейин икки кун ичида тикланиш қийин бўлишини билардик. Футболчиларимиз қўлдан келганча ҳаракат қилиб, ўйинга бор кучни беришди. Бу билан жамоамни табрикласам бўлади. Биринчи бўлиб тўп киритдик, кейин эса ўтказиб юбордик, лекин на иложи бу футбол. Мен "Андижон" билан баҳсда бошқача туйғуларни ҳис қилдим: стадиондаги муҳит, мухлисларнинг тинмай олқишлаб туриши - буларни пайтида ўз бошимдан ўтказганман. Яна ўша воқеалар эсимга тушиб кетди. Бу ерга қайтганимдан хурсандман.

- Натижадан қониқдингизми?

- Йўқ. Чунки ҳар бир ўйинни ютмасак бўлмайди. Турнир жадвалидаги ҳолат шуни тақозо қиляпти. Бугун рақиб дарвозабони анча яхши ҳаракат қилди. Андижон мен учун қадрдон шаҳар, аммо тўғрисини айтаман, бу ерга ютуқни кўзлаб келгандик.

- Бугунги ўйинда финалдан кейинги чарчоқ аломатлари кузатилгандек бўлди.

- Финалдан кейин орадан неча кун ўтди? Икки кунми? Учинчи куни майдонга тушяпмиз. Айтганимдек, бирданига тикланиб олиш осон эмас. Финалда қанча куч йўқотганимизни ҳамма кўрди. Чунки кубокни қўлга киритишни астойдил хоҳлагандик. Натижада шу икки кун фақат тикланиш билан кечди.

- Табатадзе ва Амоновни алмаштириш сабаби?

- Улар ҳам иккита ўйинни яхши ўтказишди. Шу боис бугунги учрашувда захирага олиб бошқа футболчилардан фойдаландик. Қарши ҳужумларда тез ҳаракат қиламиз деган мақсадда ёшларни туширдик.

- "Андижон" клуби сиз учун бегона эмас. Шундай экан, жамоанинг ОЧЛ 2даги иштироки ҳақида фикрингиз қандай?

- Жамоа учта ўйин ўтказиб, уч дуранг қайд этди. Гол ўтказмагани ва гол урмаганини ҳам биламан. Кейинги ўйинларда имконият яхши деб ўйлайман. Муҳими, қўлни туширмаслик керак. Яқинлашиб келаётган баҳс "Андижон" учун жуда муҳим бўлади, шу ўйинни ютиб олиш лозим. Бугун ўзаро ўйинимиздан олдин "Андижон" футболчиларига шундай дедим: ўтган йил биргаликда ишлаб ОЧЛ 2 йўлланмасини қўлга киритгандик, энди ишқибозларни янада хурсанд қилиш учун ютмасангиз бўлмайди. Ўйлашимча, кейинги ўйинларда албатта ғалаба бўлади.