VAR "Qizilqum"ga 2 ochko sovg'a qildimi?

Bu vaziyat "Bunyodkor" 1:2 "Qizilqum" (15-tur) uchrashuvining so'nggi daqiqalarida sodir bo'ldi.

Aniqroq aytsak, "qaldirg'ochlar" SHerali Jo'raevning "Qizilqum" jarima maydoni ichida to'pni qo'li bilan qaytarganini davo qilishdi. SHu o'rinda VAR ishga tushib, ehtimoliy penalti uchun asos qidirib ko'rdi. Biroq shubha tasdig'ini topmaganidan keyin Temur To'xtasinuv uchrashuvni tugatib yubordi.

Ushbu qaror tufayli VARda ishlagan Aziz Asimovga nistabatan etirozlar ko'payib ketdi. "Bunyodkor" tomoni referidan noroziligini "yumshoqlik" bilan ko'rsatar ekan, Yuriy Sarkisyan hakamlar xonasigacha kirib bordi.

Mazkur vaziyat takrorini ko'rgach, men ham hakamlar "Qizilqum"ga 2 ochko sovg'a qildi deb o'yladim (qasddan emas). SHu tufayli hamma ketib, hakamlar chiqishini kutdim. 

Aziz Asimov bilan 2 daqiqa suhbatlashdik. Men translyaciyada ketgan kadrda penalti ko'rganimni aytdim. 41 yoshli referi esa sokinlik bilan tushuntirdi: "11 metrli nuqtani ko'rsatish uchun 50% asos bo'lsa ham, bosh hakamni monitor yoniga chaqirardim. Lekin qoidaga zid harakat ko'rinmadi". 

SHundan keyin toshkentlik arbitr uyiga ketdi. Men stadionda qoldim. "Bunyodkor" masullari o'sha vaziyatdagi qaror bo'yicha protest kiritar ekan, tashqarida epizodni yana tomosha qildim: to'p qo'lga tegib, yo'nalishini o'zgartiryapti. Rosti, Asimov nega bunchalik ishonch bilan gapirganini tushunmadim...

Bugun boshqa rakursdan olingan tiniqroq lavhalarni tomosha qilib, fikrim 180 gradusga o'zgardi. SHerali Jo'raaev qo'li bilan o'ynamagan, aksincha to'p uning kuragi tomonga o'tib, SHuhrat Muhammadievning elkasiga teggani holda pastlagan. Marhamat, tomosha qiling (videolavha O'zFHMdan olindi).

Yodingizda bo'lsa, Asimov o'tgan yil ham shunday holatga tushib qolgan. Andijonda uning qaroridan norozi bo'lgan Ro'ziqul Berdiev shogirdlarini maydondan olib chiqmoqchi bo'lgandi. Har 2 holatning yakunida hakam haq bo'lib chiqdi.

Xullas, bu ko'pchilikka dars bo'lishi kerak. Hamma narsa sizga ko'ringanidek bo'lmasligi mumkin. Eng muhimi, vaziyatni to'liq o'rganmay, xukm chiqarmang.

Obuna bo'ling → FA| futbol ANALIZI