Toshkentda talabalar o'rtasida Students Cup musobaqasi o'tkaziladi

Oradan ikki yil o'tib Coca-cola mazkur loyihani tiklashga qaror qildi.

Students Cup O'zbekiston Respublikasi Prezidentining 2021 yil 5 noyabrdagi “Yurish, yugurish, mini-futbol, badminton, stritbol va Workout sport turlarini yanada rivojlantirish chora-tadbirlari to'g'risida”gi PQ-5282-son Qarori hamda 2023 yil 7 apreldagi “Ommaviy va professional futbolni har tomonlama rivojlantirishning qo'shimcha chora-tadbirlari to'g'risida”gi PQ-115-sonli Qaroriga asosan havaskorlar futbolini ommaviylashtirish, yoshlarning futbolga qiziqishini oshirish, targ'ibot ishlarini yanada kuchaytirish, ularning futbol bilan shug'ullanishi uchun shart-sharoit yaratish, oliy talim muassasalari talabalarini mini futbol musobaqasiga jalb qilish maqsadida tashkil etiladi.

PFL tomonidan ilgari surilgan tashabbus Oliy talim, fan va innovaciyalar vazirligi hamda Ichki ishlar vazirligi tomonidan to'la qo'llab-quvvatlandi. Biz bu boradagi yordami uchun har ikki tashkilot vazirlari Kongratbay SHaripov va Po'lat Bobojonovdan minnatdormiz", - deb yozadi PFL matbuot xizmati. 

Ayni vaqtda O'zbekiston futbol associaciyasi oliy talim muassasalari o'rtasida III bosqichli Talabalar ligasi musobaqasini o'tkazib kelmoqda. Students Cup Talabalar ligasi kabi davriy musobaqa hisoblanmaydi. U kubok shaklida o'tkaziladi va bir necha kun ichida g'olib jamoa aniqlanadi. PFL Coca-cola bilan hamkorlikda boshqa loyihalarni ham amalga oshirayotganidan kelib chiqib, Students Cup poytaxt va Toshkent viloyati oliy talim muassasalari talabalari o'rtasida tashkil etiladi.

Bugun — 4-aprel sanasida Oliy talim, fan va innovaciyalar vazirligi, Ichki ishlar vazirligi, O'zbekiston Professional futbol ligasi va O'zbekiston futbol associaciyasi mutaxassislari ishtirokida Students Cup musobaqasini tashkil etish yuzasidan uchrashuv bo'lib o'tadi. Musobaqa bilan bog'liq tafsilotlar Liga sahifalarida yoritib boriladi.

Musobaqada ishtirok etishni maqsad qilgan jamoa oliy talim muassasasi rektori tomonidan tasdiqlangan talabnomani Tashkiliy qo'mitaga (info@pfl.uz) taqdim etishi lozim. Talabnomaning namunaviy shakli hamda musobaqa Nizomi Oliy talim, fan va innovaciyalar vazirligi tomonidan tegishli oliy talim muassasalariga taqdim etiladi", - deb yozilgan PFL rasmiy saytida.