Srechko Katanec: "Osiyo Kubogi saralashida biz favoritmiz, ammo..."

"Assalomu alaykum (o'zbek tilida). Jamoa ertangi o'yinga tayyor. Biz faqat ertaga emas, barcha o'yinlarda g'alaba uchun harakat qilamiz. Biz diqqat etiborni saqlagan holda o'ynashimiz kerak. Hech kim o'yin boshlanmasdan oldin g'alaba qozona olmaydi, shu bois o'yinga futbolchilarni yaxshi tayyorlashimiz kerak. Barcha jamoalarni hurmat qilishimiz kerak, aks holda futbolda hamma narsa bo'lishi mumkin va sizni jazolashlari mumkin", - dedi Srechko Katanec.

"Bosh murabbiy aytib o'tganidek barcha o'yinlarda g'alaba uchun maydonga tushamiz", - dedi Eldor SHomurodov.

- Bizning fikrimizcha O'zbekiston terma jamoasi favorit hisoblanadi. Tailand biroz bizga qarshilik ko'rsatishi mumkin. SHri Lanka va Maldiv orollari terma jamoalari biroz zaifroq bo'lgani uchun rotaciya qilasizmi yoki asosiy tarkib o'yinchilarini tushirasizmi? Terma jamoamizning asosiy kuchini Eron, Yaponiya, Avstraliya kabi grandlarga qarshi bahsda ko'ramiz deb o'ylayman. Sizning fikringiz qanday?
- Gap meni raqiblardan qo'rqishimda emas, ammo bunday yondoshuvni yoqtirmayman. Biz hali o'yinlarni boshlamadik. Hozirgi zamonaviy futbol 15 yil oldingisidan ancha farqli. Agar 100 foiz tayyor bo'lmasak, SHri Lanka va Maldiv kabi terma jamoalardan syurpriz bo'lishi mumkin. Biz hali g'alaba qozonmadik, Yaponiya yoki boshqa terma jamoalar Osiyo kubogiga chiqib bo'lgan. Biz esa hozirda saralashdamiz. Aytganigizdek biz favoritmiz, favorit emasmiz deganim yo'q. Ammo yana bir bor qaytaraman har bir bahsga tayyor bo'lishimiz kerak. Oldin saralash bahslari bunday formatda o'kazilmagan: 6 kun ichida 3ta o'yin o'tkazilmagan. Oldin bitta o'yin mezbon sifatida o'ynab, keyin safarga borardingiz. Hozir nega bunday formatda o'tkazilayotgani menga qorong'u. Keyin O'zbekiston chempionat o'yinlari ancha bo'ldi tugaganiga 6 kun tanaffus bo'lmoqda, bu futbolchilarga biroz qiyin bo'ladi. Ammo barchamiz bir xil holatdamiz.

- Deyarli barcha o'yinlarda gol o'tkazib yuborayapmiz. Nega 1,5 yildan beri "So'g'diyona"da ishonchli o'ynab kelayotgan SHahboz Jo'rabekov terma jamoaga chaqirilmayapti?
- Bilasiz terma jamoaga kelganimga ko'p bo'lgani yo'q. Biz oldin sinab ko'rgan futbolchilarni chaqirdik, sababi saralash o'yinlari yangi futbolchilarni sinab ko'radigan maydon emas. Barcha futbolchilarni hurmat qilaman, lekin men uchun hozir eng kuchli futbolchilar terma jamoaga chaqirilgan.

- Ko'pchilikni qiziqtiradigan savol. Norxonov 6ta gol urgan, Abduxoliqov va G'iyosov 5tadan gol urgan, Azamov ham "Paxtakor"da yaxshi o'ynamoqda. Siz faqat legionerlarga ishonib qolganmisiz?
- SHerzod Azamov? Siz "Paxtakor" o'yinlarini ko'ryapsizmi? U nechta o'yinda maydonga tushdi? Adashmasam 3ta. Bizning o'z ishimiz bor, biz hamma o'yinlarni kuzatyapmiz. Agar hozir har xil ismlarni aytadigan bo'lsak men haq, siz nohaq bo'lib qolishingiz mumkin. Kelinglar ishimizga jiddiy yondoshaylik.

- Bobir Abdixoliqov borasidachi?
- Saralash bosqichi o'yinlarida yangi futbolchilarni sinab ko'ra olmaymiz. Tarkibga chaqirilgan futbolchilar bilan oldin birga ishlab ko'rgandik. Siz haq bo'lishingiz mumkin. SHomurodov "Roma"da kam o'ynamoqda va uni nega chaqirdingiz deyishingiz mumkin. Ammo ayni paytda Eldor bizning kuchli hujumchimiz.

- Agar vaziyat taqozo etadigan bo'lsa U-23 terma jamoasidan futbolchilarni jalb etasizmi?
- Ularni hozir chaqirishga haqqimiz yo'q. CHunki tasavvur qiling COVID bilan bog'liq nimadir bo'lsa, qoidalar bo'yicha mumkin emas. Hozir bu haqda gapirmoqchi emasman. Vaziyatni boricha qabul qilamiz.

Oqil Abdubarnaev Namangan shahridan 

Foto: Tolibjon Qosimov