Sardor Rahmonov: "Maqsadimiz chempionlik va medallar. Jurnalistlar faqat "Paxtakor", "Neftchi" va "Nasaf" haqida gapirishmoqda"

- Mavsumning dastlabki uchrashuvi OKMK uchun qanday o'tdi?

- Mavsumni g'alaba bilan boshlab oldik. Dastlabki 5-6ta turda shunday kurashga boy o'yinlar bo'ladi. Keyin esa jamoalar nimaga qodir ekanligi namoyon bo'ladi. Asosiy vazifamiz mavsumni yaxshi boshlash edi va biz buni uddasidan chiqdik. Chiroyli futbol namoyish etmagandirmiz, ammo kerakli natijani qo'lga kiritdik.

- Amaldagi vice-chempion OKMK yangi mavsumda o'z oldiga qanday maqsadlar qo'ymoqda? Turkiyadagi yig'inlardagi intervyularingizdan birida OKMK ham kuchsizlanib qolmadi degan manoda gapirgan edingiz. Sizningcha, tarkibga kelib qo'shilgan yosh futbolchilar va legionerlar jamoani qanchalik kuchaytira oladi?

- Joriy mavsumda ham chempionlik va medallar uchun kurashamiz. OKMK safidagi qanday o'zgarishlar bo'lishidan qati nazar jamoa har doim sovrinli o'rinlar uchun kurashadi. O'tgan mavsumda ham hech kim bizni hatto kuchli uchlikda ham ko'rmagandi. Yangi mavsumda ham o'tgan mavsumdagidek o'yin namoyish etishni maqsad qilganmiz. OKMK jamoasi ko'proq yoshlarga etibor bermoqda, asosiy tarkib saqlab qolindi va yosh futbolchilar xarid qilindi. Yoshlarimiz ancha iqtidorli. Legionerlarimizning darajasini vaqt ko'rsatib beradi. Bugun maydonga tushgan legioner yaxshi harakat qildi deb o'ylayman.

- Sovrinli o'rinlar uchun kurashishda OKMK jamoasiga kimlar asosiy raqib bo'lishi mumkin?

- Barcha jurnalistlar faqat "Paxtakor", "Neftchi" va "Nasaf" haqida gapirishmoqda. Hozir bir jamoani alohida ajratib o'tmayman, ammo avvalroq sanab o'tgan jamoalarda imkoniyatlar ko'p, ammo barcha jamoalarda imkoniyat bor. Kuzda kim qanday natija qayd etishini bilib olamiz.

- O'tgan mavsumda OKMK aynan "Buxoro" bilan bo'lgan bahsda ochko yo'qotib, Kubok bahslarining guruh bosqichida qolib ketgandi. O'zbekiston Kubogining yangi mavsumida OKMK qiyin guruhdan o'rin oldi. Kubokdagi maqsadlar haqida to'xtalib o'tsangiz...

- O'tgan yili Kubokda biroz omadimiz kelmagandi. "O'lim" guruhidan chiqib, kubokni qo'lga kiritishni maqsad qilganmiz. Maqsadimiz chempionlik va Kubokdagi g'oliblik.