Sanjar Tursunov: "Jarima maydonimizda to'p qo'limga tekkandi"

O'yin haqida

O'yin yaxshi ruhda o'tdi. "Andijon"ning bunday o'yin namoyish etishini kutgandik, chunki ularning taktikasini o'rgandik. Eng asosiysi — o'zimiz kutgan natijaga erishdik. Bundan xursandmiz.

- Birinchi bo'limda oddiy vaziyatlarda to'p yo'qotdingiz. Bu holat o'yinga moslashishga bo'lgan qiyinchilik tufaylimi yoki maydon holati bilan bog'liqmi?

- Barcha futbolchi xato qiladi. Maydon holati ham ancha noqulay edi. O'zimda ham kamchilik kuzatilgandir. SHunday bo'lsa-da, g'alaba qozondik. AGMKda o'z manfaatimizdan ko'ra jamoa manfaati ustun turadi.

- Gol urgan vaziyatingizdagi standart vaziyat mashg'ulotlarda ishlab chiqilgan reja bo'yicha kiritildimi yoki vaziyat taqozo etdimi?

- Vaziyat shuni taqozo etdi. SHerigim pas bergach, zarba berish uchun qulay vaziyat yuzaga keldi va bundan foydalandim.

- 55-daqiqada raqib burchak zarbasini o'yinga kiritgach, o'z jarima maydoningizda to'p sizning qo'lingizga tekkandek ko'rindi. O'sha vaziyatga oydinlik kirita olasizmi?

- Ha, to'p qo'limga tekkan desam ham bo'ladi, sababi, biroz pastga egilgan va tabiiy holatda edi, to'p qay holatda qo'limga tekkanini hakam ko'rib turgandi. Birinchi bo'limda, raqib futbolchisining qo'liga ham xuddi shunday holatda to'p tekkandi. O'sha vaziyatda hakamga etiroz bildirganimda, hakam sababini tushuntirib berdi. SHu sababdan indamadim.

- Musobaqani ko'p karra g'oliblaridan biri — "Paxtakor" tark etdi. Bu holat g'oliblik uchun imkoniyatlaringizni oshiradimi?

- Musobaqani kim tark etib, kim qolganiga ko'p ahamiyat bermasdan, o'z o'yinlarimizda g'alaba qozonishga harakat qilamiz.