Ro'ziqul Berdiev: "Bunday o'yinlarda ko'p vaziyatlar yaratilmaydi"

"G'alaba bilan barchani tabriklayman. Yaxshigina qarshilikka uchradik. Raqib uchrashuvga yaxshi tayyorgarlik ko'rgani ko'rinib turibdi va deyarli vaziyat yaratishga imkon bermadi. Raqib himoyasini xato qilishga majbur qildik va muhim uch ochkoni qo'lga kiritdik. Bugun o'yin tezligi yuqori bo'lmadi. Havo ham issiq edi. Bugun natija uchun o'ynaldi", - deya fikr bildirdi Ro'ziqul Berdiev bugungi bahs haqida.

- Rubin Xebay nega o'ynamay qo'ydi?

- Sababi Husayn Norchaev undan yaxshiroq sport formada. Norchaev bugun gol urmagandir, ammo jamoaga ko'p yordam berdi. Xebay ham o'yinga yaxshi qo'shilib ketdi deb o'ylayman. Agar zarbasi golga aylanganida, turning eng chiroyli gollaridan biri bo'lar edi.

- Terma jamoa safidan qaytgan futbolchilarning holati qanday?

- Bu har doim tasir qiladi. Sababi terma jamoada va klubda turli xil tizimda tayyorgarlik ko'riladi. Har bir futbolchining holati har xil. Akmal bugun bizga yordam berdi, ammo biz kutgan o'yinni namoyish eta olmadi. Bazida ushbu faktor o'z so'zini aytadi.

- Akmal so'nggi vaqtlarda maydonda ko'p bahslashadigan bo'lib qoldi...

- Suhbat olib borish kerak. U qiziqqon, ammo futbolchi o'zini nazorat qila olishi kerak. Keraksiz joydan kartochka olib qo'yishi mumkin.

- "Nasaf" futbolchilari ko'pincha darvozabon hududidan gol urishmoqda, nega uzoq masofadan zarbalar kamayib ketdi. Bu sizning ko'rsatmangizmi?

- Men uzoqdan tepinglar deb ko'rsatma beraman. Angliya va o'zbek futbolini taqqoslash ham noto'g'ri. Bazida yigitlar bunday qaror qabul qilishmaydi. Uzoq masofalardan ham gollar urdik. Bugun "Navbahor" yaxshi himoyalandi va bunday o'yinlarda ko'p vaziyatlar yaratilmaydi.

- Sherzod Nasrullaev bugun maydonga tushmadi...

- U terma jamoa safidan qaytdi va jamoa bilan birga ko'p mashg'ulot o'tkaza olmadi. Engil jarohati borligi tufayli, tavakkalga qo'l urmadik. Keyingi uchrashuvlarda safga qaytadi degan umiddaman.