Ro'zimboy Ahmedov: "Tarkibga yana 1-2 nafar futbolchi qo'shilishi mumkin, Superligada yaxshi o'rinlar uchun kurashamiz"

 Bugun jamoa xorij yig'ini doirasidagi ilk nazorat uchrashuvida o'tkazadi. Klub bosh direktori Ro'zimboy Ahmedov tayyorgarlik va tarkibdagi o'zgarishlar haqida fikr bildirdi. 

"Mashg'ulotlarni ko'ngildagidek boshladik. Havo ham ajoyib. Maydonlar ham ideal darajada. Mashg'ulot o'tish uchun hamma sharoit bor. Oldinda bizni 4 ta nazorat uchrashuvi kutib turibdi. Mana shu o'yinlarda jamoamiz yanada formaga kirib oladi deb o'ylayman. Chempionat startiga yaxshi tayyorgarlik va ko'tarinki ruhda etib kelamiz. 

Hozirda asosiy vazifa og'ir yuklamalardan so'ng tezroq sport formaga kirib olishdir. Superligani 9 mart kuni boshlaymiz. Bunga oz vaqt qoldi. Jamoamiz bu fursat ichida optimal formaga kirib olishi kerak. Kuniga 2 mahaldan mashg'ulotlar olib borilyapti. Yuklamalar berilmoqda. Tarkibimiz shakllanib boryapti. Yana 1-2 nafar futbolchi qo'shilishi ehtimoli bor. Bu masala yaqin kunlarda hal bo'ladi. O'yinimizga, taktikamizga mos futbolchilarni jalb qilyapmiz. 

Rahbariyatimizga, shaxsan viloyat hokimimizga yaratib berilgan sharoitlar uchun minnatdorchilik bildirib qolaman. Jamoamiz uchun bu yil o'zgacha bo'lishi kerak. Nasib qilsa, Superligada yaxshi o'rinlar uchun kurashamiz",- deydi Ro'zimboy Ahmedov.