"Professional futbolchi sifatida yanada o'sish uchun Evropa futbolida o'ynashni to'g'ri deb bildim". Husniddin Aliqulov "Nasaf" muxlislariga xayrlashuv maktubi yo'lladi

"Qadrli "Nasaf" klubi muxlislari! 

Dastlab sizlarga katta rahmat aytmoqchiman! "Nasaf"da baxtli edim, g'alabada ham, mag'lubiyatda ham birga bo'ldingiz. Har daqiqa sizlarning qo'llab-quvvatlashingizni his etib turdim. Jamoani shunday tarzda qo'llashda davom etishingizni so'rab qolardim. Zero, "Nasaf" sizlar uchun o'ynaydi! 

Fursatdan foydalanib, "Nasaf"dagi barchaga, rahbariyatdan tortib, klubdagi barcha xodimlarga, muxlislarga katta rahmat aytaman! O'z navbatida, Ro'ziqul Sadullaevich Berdievga alohida minnatdorchiligimni bildirmoqchiman. Har bir o'yinda bosh murabbiyning ishonchini oqlash uchun maydonga tushdim va klub uchun borimni berdim. O'z o'yinim va gollarim bilan jamoa g'alabalariga oz bo'lsa ham hissa qo'shganimdan faxrlanaman. "Nasaf"dagi faoliyatim yakunlandi, sababi professional faoliyatimda oldinga intilish vaqti etib keldi. Barcha futbolchilar singari men ham o'zimni legioner sifatida sinab ko'rishni xohladim. 

Faoliyatimni Turkiyaning "Rizespor" klubida davom ettirishga qaror qildim. To'g'ri, oldimda Osiyoning bir qator klublaridan takliflar bor edi. Ammo professional futbolchi sifatida yanada o'sish uchun Evropa futbolida o'ynashni to'g'ri deb bildim. Turkiya Superligasida yurtimiz sharafini munosib himoya qilishga, maydonda oxirgi kuchim qolguncha o'ynashga vada beraman. 

SHuni unutmangki, men doim "Nasaf" muxlisi bo'lib qolaman", – dedi futbolchi.

Husniddin Aliqulov bugun Turkiya Superligasi vakili "Rizespor" bilan 3 yillik shartnoma tuzgan edi.