Oliy liga. 11-tur ramziy terma jamoasi

Darvozaga "Mashal" klubi posboni Javohir Ilyosovni qo'yishga qaror qildik. Qashqadaryo derbisida Ilyosov o'zini yaxshi tomonlama ko'rsatdi. "Nasaf" futbolchilarining bir qator zarbalarini qaytargan Javohir ramziy termadan o'rin oldi. Uning o'tkazgan yagona golini esa hech qaysi darvozabon qaytara olmas edi.



"Qo'qon-1912" himoyachisi Darko Gojkovich "Lokomotiv" bilan o'yinda jamoasi uchun muhim golni urish bilan birga raqib vakillariga qarshi juda yaxshi o'ynadi.



"So'g'diyona" o'z maydonida "SHo'rtan"ni mag'lub eta oldi. Ushbu uchrashuvda jizzaxliklar himoyachisi Sardor Qulmatov o'zini yaxshi tomonlama ko'rsata oldi.

"Neftchi" Navoiyda "Qizilqum" bilan 2:2 hisobida durang o'ynadi. Jamoa himoyachisi Hamza Karimov himoyada juda faol harakat qildi va ramziy termadan o'rin oldi. 

"Qizilqum" vakili Fayzulla Qambarov ham ramziy terma jamoasidan o'rin oldi. Qambarov himoyachi bo'lishiga qaramay gol urishga muvaffaq bo'ldi. 



"Obod" o'z muxlislari qarshisida oliy ligaga qaytgan "Dinamo"ni qabul qilib 3:1 hisobida zafar quchdi. Toshkentliklar sardori Doniyor Hasanov uchrashuvda chiroyli gol urdi va bahs davomida jamoasi o'yinini boshqardi.

"Nasaf" yarim himoyachisi Islom Rashidxonov "Mashal" bilan o'yin taqdirini hal qilgan golni urdi. Yosh futbolchi o'z ustida ishlashda davom etsa keyingi turlarda ham ramziy termadan o'rin olaveradi.



"Bunyodkor" yarim himoyachisi Dostonbek Hamdamov Toshkent derbisida hisobni ochdi. Bundan tashqari qanotda raqibni bir necha marta aldab o'tishga erishdi va jamoasi hujumini boshladi.

"Lokomotiv" vakili Jaloliddin Masharipov Qo'qondagi bahsda faol va chaqqon harakatlari bilan ajralib turdi. U jamoasi hujumlarini tashkil qilishda boshqalardan ustunlik qildi.

"Olmaliq" Toshkent viloyati derbisida "Metallurg"ni mag'lub etishga erishdi. Viktor Kumikov boshchiligidagi jamoada SHoxnazar Norbekov navbatdagi o'yinda ham hujumdagi tezkor harakatlari bilan ajralib turdi. Aynan Norbekovning harkatlaridan so'ng penalti belgilandi.



Nemanya Yovanovich "Navbahor"ning safardan 1 ochko bilan qaytishiga katta xissa qo'shdi. Hujumchi burchak to'pidan so'ng ikkita gol urdi.

Darvozabon
Javohir Ilyosov ("Mashal") (3-marta ramziy terma jamoada)

Himoyachilar
Darko Gojkovich ("Qo'qon-1912")
Sardor Qulmatov ("So'g'diyona")
Fayzulla Qambarov ("Qizilqum") (2)
Hamza Karimov ("Neftchi")

Yarim himoyachilar
Doniyor Hasanov ("Obod")
Islom Rashidxonov ("Nasaf")
Doston Hamdamov ("Bunyodkor")
Jaloliddin Masharipov ("Lokomotiv") (3)

Hujumchilar
SHoxnazar Norbekov ("Olmaliq")
Nemanya Yovanovich ("Navbahor") (2)