OLIMPIADAGACHA. Akrom Komilov: "Ispaniya individual kuchli, lekin o'zbekistonlik yigitlar hech kimdan qolishmaydi"

Vakillarimiz Ispaniyaga qarshi bahs bilan musobaqani boshlaydi. Mazkur o'yin oldidan o'z vaqtida O'zbekiston OTJ safida qita chempioni bo'lgan Akrom Komilovning fikrlari bilan qiziqdik. 

"Birinchi navbatda yigitlarni Olimpiadaga chiqqani bilan tabriklayman. Ular bunga munosib edi. Men ham bir necha yillar oldin OTJ tarkibida musobaqa saralashida ishtirok etganman. Tarkibimiz kuchli bo'lganiga qaramay omadimiz kelmagan. Bu avlod esa yillar davomida yaxshi rivojlanishga erisha oldi. Ularga maksimal darajada qulayliklar yaratib berildi. Katta futbolda 3-4 yildan buyon o'ynashmoqda. Bu futbolchilarimizning ustun tomoni hisoblanadi. 

Ispaniya bilan imkoniyatlarimiz 50/50 degan bo'lardim. Bu yoshdagi terma jamoalar bilan O'zbekiston tengma-teng harakat qila oladi. To'g'ri, ularda individual kuchli futbolchilari bor. Lekin bizda ham ulardan qolishmaydigan kuchli ijrochilar jamlangan. O'ylaymanki, olimpiyachilarimiz bugun muxlislarni xursand qilishadi. 

Bunday turnirlarda xarakter ko'rsata olgan jamoalar uzoqroqqa bora olishadi. Qaysidir terma jamoani ajratib ko'rsata olmayman. 

Parijda Eldor SHomurodov, Oston O'runov, Abduqodir Husanov, Jasur Jaloliddinovdan ko'p narsa kutyapman. Ular terma jamoani oldinga etaklay oladi. Barchaga omad tilayman",- deydi Akrom Komilov.