OFK prezidenti O'FF rahbariyatini futzal bo'yicha Osiyo chempionatidagi 3-o'rin bilan tabrikladi

Osiyo Futbol Konfederaciyasi prezidenti Salmon bin Ibrohim al-Xalifa futzal bo'yicha O'zbekiston milliy terma jamoasini Vetnamning Xoshimin shahrida bo'lib o'tgan Osiyo chempionatida 3-o'rinni egallagani munosabati bilan O'zbekiston Futbol Federaciyasi prezidenti Mirabror Usmonov nomiga tabrik yo'lladi.

Butun Osiyo futbol jamoasi nomidan men O'zbekiston Futbol Federaciyasini ushbu muvaffaqiyat bilan tabriklashni istardim, - deydi al-Xalifa.

OFK prezidenti o'z tabrigida terma jamoani ushbu musobaqaga tayyorlagan texnik guruhga, ularning o'z ishlariga sidqidildan yondashib, tinimsiz mehnat qilganliklari uchun ham minnatdorlik bildirgan.

Sizning rahbarligingiz ostida O'zbekiston Futbol Federaciyasi bundan keyin ham rivojlanishda davom etib, butun Osiyo futbol muxlislarini quvontirish va zavqlantirishda davom etadi, - deyiladi OFK prezidenti tabrigida.

Eslatib o'tamiz, 30 aprel – 10 may kunlari Vetnamning Xoshimin shahri arenalaridan bo'lib o'tgan futzal bo'yicha 13-Osiyo chempionati bahslarida Bahodir Ahmedov qo'l ostidagi O'zbekiston futzal terma jamoasi uchinchi o'rinni egalladi.